Енді қағидалардың жаңа редакциясына сәйкес, субсидиялау Ұлттық банктің базалық мөлшерлемесі мен жылдық 7,5 пайыз теңгемен жиынтық көрінісі ретінде есептелген номиналды сыйақы мөлшерлемесінен аспайтын мөлшерлемеде жүзеге асырылады.
Бұған дейін сыйақы мөлшерлемелерін субсидиялау тетігі ауыл шаруашылығы техникасын, жабдықтар мен ауыл шаруашылығы жануарларын сатып алуға, негізгі құралдарды сатып алуға, құрылысқа арналған қарыздар бойынша сыйақы мөлшерлемесін 10 пайызға, айналым қаражатын толықтыру бойынша 7 пайызға, көктемгі егіс және егін жинау жұмыстарын жүргізуге 9 пайызға төмендетуді көздеді.
Егер қарыз шартын жасасу кезінде базалық мөлшерлеме жылдық 14 пайызды құраса, бұл жағдайда субсидиялауға жататын номиналды сыйақы мөлшерлемесі 21,5 пайыздан аспауға тиіс.
Қарыз алушы номиналды сыйақы мөлшерлемесінің 6 пайызын төлейді, Ұлттық банктің базалық мөлшерлемесі мен 7,5 пайыз жылдық пайыздық жиынтық сомасы мен қарыз алушының теңгемен төлеген 6 пайызы арасындағы айырманың нәтижесінде алынған номиналды сыйақы мөлшерлемесінің қалған бөлігі мемлекеттік бюджеттен субсидияланады (сыйақының номиналды мөлшерлемесі 21,5 пайыз болған кезде АӨК субъектісі 6 пайыз төлейді, мемлекет 15,5 пайыз субсидиялайды).
Субсидиялауға мынадай бағыттар жатады: ауыл шаруашылығы техникасын, оның ішінде аспалы және тіркемелі жабдықтарды сатып алуға, сондай-ақ ауыл шаруашылығы жануарларын сатып алуға, негізгі құралдарды сатып алуға, құрылыс салуға (ұн, минералдық сулар және алкогольсіз сусындар өндіруге арналған негізгі құралдарды сатып алуға арналған қарыздарды қоспағанда) арналған. Сондай-ақ өндірістік процестің технологиялық циклі үшін қажетті айналым қаражатын толықтыру мен көктемгі егіс және егін жинау жұмыстарын жүргізуге арналып та субсидия ұсынылады.
«Осылайша, осы бағдарлама шеңберінде қолдау шарттары қаржы нарығындағы өзгерістерге жедел ден қою мақсатында Ұлттық банктің базалық мөлшерлемесін ескере отырып қайта қаралды және бұл субсидиялау қағидаларына жиі өзгерістер енгізу қажеттілігін жояды. Жоғарыда аталған жаңалықтар ағымдағы жылдың 25 шілдесінен бастап күшіне енеді», делінген ведомство хабарламасында.
