Жүлде қоры 251,7 мың АҚШ долларын құрайтын WTA санатындағы BNP Paribas Poland Open жарысында қазақстандық теннисші германиялық Анна-Лена Фридзаммен бірге жұп құрап өнер көрсетуде. Осы жарыстың 4-ракеткалары болып тіркелген Данилина мен Фридзам бастапқы кездесуін нидерландтық Арианна Хартоно мен аустралиялық Оливия Тьяндрамулиямен өткізді. Қазақстандық-германиялық жұп бірінші партияда мықтылық танытып, 6:3 есебімен басым түсті. Екінші сетте қарсыластары белсенді ойнап, есе қайтарды – 6:1. Супер тай-брейкте Данилина мен Фридзамның мерейі үстем болып, жеңісті жұлып алды – 10:6.
Енді Данилина мен Фридзам турнирдің ширек финалында румыниялықтар Александра Игнатик пен Габриэла Лимен кездеседі.
