Облыс орталығындағы қоғамдық көліктердің мәселесі лайықты шешім таппай келе жатқанына біраз болды. Айталық, кез келген семейліктен сұрасаңыз, бағыттағы автобустардың аздығына, жүргізушілер мен кондукторлардың қызметіне шағымдана жөнеледі.
Жол ақысын төлеу рәсімі бір ізге түсірілмегені де халыққа қолайсыз. Егер де кейбір автобустарда жол ақысын қолма-қол ақшамен төлеуге тура келсе, басқаларында көлік картасы қабылданады. Осы және автобустардың маршруттардан ерте шығып кетуі жайлы өңір басшысы жолаушыларды тасымалдайтын компания өкілдеріне айтып, мәселені жылдам реттеуді тапсырды.
«Автобустар жұмысын ерте аяқтайтынын ескерсек, кейбір қоғамдық орындарға да белгіленген уақыттан бұрын жұмыстарын тоқтатуға тура келеді. Бұл мейрамханалар немесе басқа да ойын-сауық орталықтарына қатысты емес. Мәселе халық серуендейтін қалалық саябақтарда болып тұр. Айталық, жеке өзім саябаққа барып, оның 19.30-да жабық тұрғанын байқадым. Неге? Өйткені бұл уақыттан кеш қалса адамдар үйлеріне жете алмай қалады», деді Н.Ұранхаев.
«Семавтопарк» ЖШС-ның директоры Григорий Пинчук бұл мәселеден хабардар екенін айта келе жуық арада оны шешудің жолдарын қарастыратынын жеткізді.
«Біз қызметкерлердің жалақысын көтеру мен кешкі уақыттарда автобустардың санын ұлғайтуға байланысты ұсыныстарды пысықтадық», деді Г.Пинчук.
Облыс әкімі бұл мәселе қала үшін маңызды болғандықтан оны міндетті түрде шешу керек екенін жеткізді. «Жалақыны көтеріп, маршрут санын ұлғайтумен бірге автобустардың қозғалыс кестесін ұзартқан дұрыс. Өз тарапымыздан жылы аялдамалардың мәселесімен айналысамыз», деді Н.Ұранхаев.
Абай облысы
