Зиянкестердің күрт көбеюіне әсер ететін негізгі фактор түрлі тұрмыстық қалдықтардың бей-берекет тасталуы. Осының салдарынан қала аумағындағы саябақтарда, әсіресе көпқабатты үйлердің маңында адам денсаулығы үшін аса қауіпті кеміргіштер көбейеді. Мамандардың сөзінше, кеміргіштердің кейбір түрлері тіпті өлім жағдайларына әкеліп соқтыратын жұқпалы аурулардың ошағы саналады.
Қышыма кененің кейбір тұқымдастары тіпті көзге де шалынбайды. Бұл жәндік адам бойында бөртпе, сүзек, кене энцефалиті, туляремия сияқты аурулардың өрбуіне жол ашады. Мұндай кенелер жаңбырдан кейін көгалды жерлерде көптеп кездеседі. Сондықтан табиғат аясына көкке шығатын тұрғындар бұл жағдайды қаперінде ұстағаны абзал. Мамандар зиянкестермен күрес мәселесі әрдайым басты назарда, бірақ, әр азамат тазалыққа мән беріп, сақ жүргені жөн дегенді айтады. Алматы қаласы аумағын зиянкестерден залалсыздандыру жұмыстарының жазғы науқаны қыза түскен. Арнаулы кесте негізінде таулы аймақтар мен демалыс орындарында, қала аумағындағы саябақтарда залалсыздандыру жұмыстары жүріп жатыр. Бұған құрамында тәжірибелі эпидемиолог дәрігерлер бар мамандар тобы жұмылдырылған.
АЛМАТЫ
