Сондай кәсіпкердің қатарында көз дәрігері Асыл Ахметова да бар. Ол 13 жыл бұрын кәсіпкерлікке бет бұрған. Жеті жыл бұрын «Жарқыра» атауымен көзілдірік дайындайтын салон ашқан. Ауылдастарының көз жанары суалмауын ойлаған дәрігер кәсібінің материалдық базасын нығайту үшін «Бизнестің жол картасы-2025» бағдарламасына құжат тапсырып, 3 млн теңге көлемінде қайтарымсыз грантқа ие болған. Сөйтіп, салонын көздің қан қысымын өлшейтін арнайы құралмен толықтырды.
– Қазір көз ауруы көбейіп тұр. Бұл ауру жас талғамайды ғой. Әсіресе балалар арасында көру қабілеті төмендегені алаңдатады. Балалардың көз ауруын ерте емдемесе, кейін асқынып кетуі мүмкін. Олар дәрігерге көзін қаратып, көзілдірік алу үшін облыс орталығына, өзге қалаларға бара алмайды. Осындай себеппен, осы істі қолға алдым, – дейді Асыл Ахметова.
Кәсібін бастағалы бірнеше рет несие алуына тура келді. Алдымен Ауыл шаруашылығын қаржылай қолдау қорының алты пайыздық жеңілдігімен 6 млн теңгесіне қол жеткізді. Бұл қаржыға көзді тексеретін заманауи үлгідегі аппараттарды, түрлі көзілдірікті дайындайтын станоктар әкелген. Кейін 2020 жылы «Даму» қорынан берілген 20 млн теңге несиеге балалардың көз ауруын емдеуге қажетті құрал-жабдықтар сатып алған. Ол ашқан салонда мереке күндері балаларға, көпбалалы аналарға, мүмкіндігі шектеулі жандарға арналған арнайы жеңілдік жасалады. Қазір Құлсары қаласындағы екі нүктеде алты адамға жұмыс беріп отыр. Олардың жалақысын уақтылы төлейді.
Бұл ауданда аталған бағдарламамен медицина саласындағы кәсібін бастаған жанның тағы бірі – Айзада Қалуова. Тіс емдеу ісінде бесжылдық еңбек өтілі бар ол былтыр «Бизнестің жол картасы-2025» бағдарламасының қаржылай грантын алған. Қазір үш маманды тұрақты жұмысқа тартып отыр.
– Тіс емдеудің өзіндік қиындығы, тәсілі бар. Жаңа технологиялар да енгізіліп жатыр. Сондай инновациялық аппаратты сатып алып, тіс емдеуді бастадым. Бұл аппараттың ерекшелігіне тоқталсам, тістегі көрінбейтін инфекцияны 25 есеге үлкейтеді. Кәсібімді бастау үшін мемлекеттің қайтарымсыз қаржы беретіні бізге үлкен қолдау болып отыр, – дейді Айзада Қалуова.
Атырау облысы
