Талантымен топ жарған Айбек Қасымханов – алты жасынан бастап домбыра тартуды үйреніп, содан бергі аралықта талай мәрте өнер сайыстарына түскен өрен.
– Мен Қарағандыдағы мамандандырылған музыка мектеп-интернатында домбырамен ән айту сыныбында оқимын. Менің жетекшім – Азамат Түсіпбеков. Көптеген облыстық, республикалық және халықаралық байқау мен фестивальға, сондай-ақ «Қазақстан дауысы» жобасына қатысып, жүлделі орындарға ие болдым, – дейді Айбек Қасымханов.
Грузиядағы халықаралық байқауға жас өнерпаз Түркиядағы жеңісінен кейін жолдама алған.
– Өткен жылы мен Алматыда өткен халықаралық байқауға қатысып, бірінші орын алдым, содан маған Түркияда ұйымдастырылған өнер сайысына жолдама берілді. Мен онда да бірінші болып, Грузияда өтетін халықаралық музыкалық байқауға қатысуға шақырту алдым. Шілде айының соңында ол жерге барып, сәттілік серігім болып, Гран-при жеңіп алдым. Келесі жылы тағы да Грузиядағы музыкалық жарысқа қатысуды жоспарлап отырмын, өйткені мен сертификат еншіледім. Болашақта өз өмірімді музыкамен байланыстырғым келеді. Домбыра мен дәстүрлі халық әндерін дәріптеймін. Мектепті бітіргеннен кейін Алматыдағы Қазақ ұлттық өнер академиясына оқуға түсу жоспарымда бар, – дейді жас домбырашы.
Айбек Қасымханов негізінен халық әндерін орындайды. Түркия мен Грузиядағы байқауларда ол «Бастау» мен «Хәләулім» туындыларын шырқады. Айбек Қасымхановтың есімі «Қазақстанның алтын балалары» кітабына енді.
