Мемлекет басшысы Қ.Тоқаев елімізде 1 мың ІТ маманын даярлау жөнінде тапсырма жүктегені белгілі. Осы орайда политехникалық колледж ІТ мамандар даярлауда жақсы нәтижелерге қол жеткізіп келе жатқан табысты білім беру мекемесі ретінде танылып келеді. Мысалы, статистика бойынша 2020 жылы колледждің ІТ бағытындағы түлектерінің 92 пайызы жұмысқа орналасса, былтыр бұл көрсеткіш 96 пайызды құраған. Мұндай нәтижеге 2019 жылы ІТ-орталық колледжінің базасында STEM-аймақ, коворкинг орталығы, бейне және фотостудия, Бизнес-инкубатор, WorldSkills жаттығу лагері құрылып, жұмыс істегені оң ықпал етті. Мұнда сонымен қатар Cisco және steam желілік академиялары жұмыс істейді. Орталықта студенттерге арналған Web-дизайндеу мен әзірлеу, 3D-модельдеу, CAD платформасында жобалау практикалық сабақтары мен оқыту курстары өткізіледі. Сондай-ақ колледжде жаңа ІТ-технологияларды меңгеруге арналған зертхана жұмыс істейді. Жалпы, бүгінде облыс көлемінде 59 IT-сынып, 12 STEAM-кабинет, IT-мектеп бар.
Сондай-ақ колледж қазіргі заманғы еңбек нарығының талаптарын ескеріп, құрылыс саласында мамандар даярлауға ерекше көңіл бөліп отыр. Бүгінде мұнда осы мамандықтарда 141 студент білім алуда.
Колледж директоры Ерқат Мұқажановтың айтуынша, білім ордасы бүгінде NCCER Project Supervision бағдарламасы бойынша Ұлттық оқыту және құрылыс саласындағы зерттеу орталығында аккредиттеуден өткен оқу орталығы мәртебесін алу үшін халықаралық салалық бағалаудың үшінші кезеңін аяқтады. Аккредиттеуден сәтті өткен жағдайда мекеме құрылыс саласындағы жұмыскерлерді сертификаттауға құқық беретін халықаралық үлгідегі құжатқа ие болады. Бұл сертификат маман құзыретінің кәсіби стандарттарға, оның ішінде халықаралық стандарттардың талаптарына сәйкестігін тануға және растауға арналған. Халықаралық салалық аттестаттаудың барлық кезеңін жыл соңына дейін аяқтау жоспарланып отыр.
«Ең басты міндетіміздің бірі – түлектерімізді жұмысқа орналастыру деңгейін арттыру, олардың білімінің, іскерлігі мен дағдыларының бәсекеге қабілеттілігін көтеру. Сондықтан біз құрылыс мамандықтары бойынша халықаралық салалық аккредиттеуден өтуге шындап кірістік. Бұл ретте бізге «Талап» КеАҚ тиісті қолдау көрсетті. Осы сынақтан сәтті өтсек, бұл бізге құрылыс саласындағы жұмысшылардың біліктіліктері бойынша импорт алмастыруды қамтамасыз етуге мүмкіндік береді. Сөйтіп, бірте-бірте отандық ірі компаниялар шетелдік мамандарды жұмысқа шақыруды азайтатын болады. Тіпті оған қажеттілік те болмайды. Біздің түлектеріміз қолдарына халықаралық сертификат алып, өздерінің бәсекеге қабілеттілік деңгейін арттырумен қатар еңбекақысының деңгейін де едәуір арттыра алады. Демек жыл өткен сайын біз кеңседе жұмыс істейтіндер ғана жақсы ақша таба алады деген стереотипті жеңеміз деп ойлаймын. Осылайша, жастар колледжде оқып, қажетті жұмысшы мамандығын меңгеріп те табысты бола алатынын түсіне бастайды», деді Е.Мұқажанов.
Колледж басшысының айтуынша, осы жобаның шеңберінде мекеменің 5 оқытушысы 1-5 тамыз аралығында бірнеше позиция бойынша қысқа мерзімдік курстан өткен. Енді олар NCCER базасында оқытушы, үлгерімді бақылаушы, оқу бағдарламасының инспекторы ретінде тіркелді.
Жетісу облысы
