Еңбек және халықты әлеуметтік қорғау министрлігінің мәліметі бойынша Әлеуметтік қызметтер порталы мүгедектігі бар адамдарға оңалтудың техникалық құралдары (ОТҚ) мен қызметтерін өндірушіні және жеткізушіні өз бетінше таңдауға мүмкіндік береді. Көмек түріне тапсырыс беру қызметті алушының электронды цифрлық қолтаңбасымен растау арқылы жүзеге асырылады. Тапсырыс берілген құралдарды өз бетінше әкете алады немесе жеткізу қызметі арқылы алуға болады.
Мүгедектігі бар адамдарды оңалту құралдарымен қамтамасыз ету протездік-ортопедиялық, сурдотехникалық, тифлотехникалық және гигиеналық құралдар, сондай-ақ кресло-арбалар беруді қамтиды.
Бүгінгі таңда порталда арнаулы әлеуметтік қызметтер көрсететін 824 медициналық-әлеуметтік мекеме (бөлімшелер), 246 ОТҚ жеткізуші, 25 мыңнан аса жеке көмекші, 635 ымдау тілін қызметін, 90 санаторлық-курорттық емдеуді, 65 кепілдік берілген әлеуметтік топтаманы жеткізушілер тіркелген.
«Әлеуметтік қызметтер порталы» автоматтандырылған ақпараттық жүйесін енгізу Мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі ұлттық жоспар шеңберінде қарастырылған.
Қолдауға арналған байланыс орталығына 1414 бірыңғай нөміріне қоңырау шалып, тілді таңдау және 5 санын басу арқылы порталды пайдалану бойынша кеңес алуға болады.
