Дәстүр бойынша сауалдамаға қатысатын респонденттердің әрқайсысы өздерінің көзқарасы бойынша бір айда өрелі өнерімен көзге түскен үш үздік футболшыны таңдап алып, әрі қарай, орындарға байланысты ойыншыларға ұпайлар береді. Мәселен, ең үздік деп тапқан футболшысына 3 ұпай, кейінгісіне – 2, соңғысына 1 ұпай береді. Нәтижесінде, барлық ұпайлар жинақталып, айдың үздігі анықталады.
Шілде айының сауалдама қорытындысы бойынша Қазақстанның ең үздік футболшысы деп «Ордабасы» мен Қазақстан ұлттық құрамасының жартылай қорғаушысы Эльхан Астанов танылды. Шілде айында «Ордабасы» сапында бес ойында (чемпионатта бір, кубок жолындағы бәсекеде төрт матч) жасыл алаңға шыққан Астанов үш гол соғып, әріптестеріне үш мәрте нәтижелі пас берген. Сауалдамада ол 51 ұпай жинады. Екінші орынды «Мақтаарал» шабуылшысы Рамазан Кәрімов иеленсе, үздік үштікті «Астананың» португалиялық жартылай қорғаушысы Педро Эуженио түйіндеді.
Сондай-ақ «Ордабасы» клубының бас бапкері Александр Седнев шілде айының ең үздік бапкері атанды. Сауалдамаға қатысқан 14 бапкердің бесеуі өз дауысын Беларусь маманына берген. Александр Сергеевич биылғы маусымда осымен екінші рет айдың үздік бапкері болып танылды. Бұған дейін ол сәуір айында үздік шыққан еді.
Екінші орынды Петропавлдың «Қызылжарын» жаттықтыратын қазақстандық жас маман Әли Әлиев иеленді. Ол өткен айда УЕФА Конференциялар лигасында сенсация жасап, хорватиялық «Осиек» клубынан басым түскен болатын. Сондай-ақ шілде айының қорытындысы бойынша үшінші орынды Нүркен Мәзбаев («Тараз») пен Андрей Ферапонтов («Мақтаарал») өзара бөлісті.
Сонымен қатар Екінші лигада «Тұранның» жастар командасының шабуылшысы Бақдәулет Зулфықаров төртінші ай қатарынан «Оңтүстік-Батыс» конференцияның үздік ойыншысы атанды. Шілде айында Зулфықаров «Атырау жастар» командасының қақпасына жеңіс голын соғып, жарыстың сұрмергендер тізімінде көш бастады. Екінші орынды «Оңтүстік академиясының» жастар командасының шабуылшысы Мағжан Тоқтыбай иеленді. Үздік үштікті «Тұран» жастар командасының тағы бір футболшысы Ғани Сүлеймен қорытындылады.
Айта кетейік, ертең Қазақстан кубогы жолындағы топтық кезеңнің соңғы тур ойындары басталды. Бұл турда «Каспий» – «Ақжайық», «Мақтаарал» – «Тараз», «Қайрат» – «Атырау», «Ақсу» – «Ордабасы», «Жетісу» – «Тұран», «Шахтер» – «Астана», «Ақтөбе» – «Тобыл», «Қайсар» – «Қызылжар» клубтары кездеседі.
