Ішкі істер министрінің орынбасары – Ұлттық ұланның Бас қолбасшысының бұйрығымен кіші сержант Айбат Есіркеп пен қатардағы жауынгер Оралбек Жиенбай «Қазақстан Республикасының құқықтық тәртіп әскеріне – 30 жыл» медалімен марапатталды. Сондай-ақ қатардағы жауынгерлер Нұрбол Тілеубек пен Ерболат Қанатбекке астаналық жедел құрама командирінің грамотасы табыс етілді.
Жауынгерлерге марапатты салтанатты түрде Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары, Халық қаһарманы, полковник Қайрат Үмбетов табыс етті. Бас тәрбиеші сарбаздарға батыл іс-әрекеттері үшін алғыс білдіріп, ағалық ақ тілегін жеткізді.
– Бүгінде Ұлттық ұланның жеке құрамы өздеріне жүктелген жауынгерлік міндеттерді абыроймен атқарып келеді. Біздің сарбаздарымыздың бұл әрекеті ұландықтардың антқа адал екенін және азаматтардың құқықтары мен қауіпсіздігін қорғауға айтарлықтай үлес қосатынын тағы да дәлелдеді. Сол күні олар жанқиярлық танытып, өз өмірлерін қатерге тігіп, батылдықтың жарқын үлгісін көрсетті. Олардың үйлесімді әрекеттерінің арқасында адам өмірі аман қалды. Барлық жас жауынгерге қызметте табыс, барлық бастамаларына сәттілік, лайықты қызмет және үйлеріне аман-есен оралуын тілеймін, – деді полковник Қ.Үмбетов.
Естеріңізге сала кетейік, оқиға 9 тамызда болған еді. 5573 әскери бөлімінің әскери жасағы патрульдеу барысында ер адамның Есіл өзенінің жағалауы жағынан көмек сұрап айқайлағанын естіп қалады. Ұландықтар жедел әрі батыл әрекеттерімен суға батып бара жатқан азаматты судан шығарып, алғашқы медициналық көмек көрсеткен.
