Таяуда Қарағанды облысындағы Абай қаласында осы спортқа арналған жаңа скейт-алаң ашылды. Ол «Жігер» стадионы маңындағы саябақта орналасқан. Енді мұнда скейтборд, скутер және BMX велосипедтерін тебетін экстремалды спорт әуесқойлары өз шеберліктерін жетілдіре алатын болады.
«Абай ауданының спорт клубы» КМҚК директорының орынбасары Сәуле Қожахметова құрылыс жұмыстарының биылғы маусым айында басталып, тамызда аяқталғанын мәлім етті.
– Балалар мен жасөспірімдердің қуанышында шек жоқ. Күнде алаңда жүретін олардың қарасы да мол. Айта кететін жайт, скейт-алаңда барлық міндетті қауіпсіздік ережелері қатаң сақталады, – деп атап өтті ол.
Жаңадан салынған скейт-алаңда кәсіби велошабандоздармен қатар спорттың осы түрін меңгеруді жаңадан бастағандар да өз шеберліктерін ұштай алады.
Жалпы, Қарағанды облысының қалалары мен ауылдарында бұқаралық спортты дамыту жолында қыруар шаралардың атқарылып жатқанын айта кеткен ләзім. Абайдағы скейт-алаң сияқты басқа да спорт түрлері нысандарының көптеп салына бастағаны осының айқын дәлелі.
Қарағанды облысы,
Абай ауданы
