Көш басына жартылай жеңіл салмақтың чемпионы Александр Волкановски көтерілді. Келесі айдың аяғында 34 жасқа толғалы отырған аустралиялықтың осы спорт түрін серік еткеніне 10 жылдан асты. Оның алдында Волкановски грек-рим күресі және регбимен шұғылданған. 2013 жылдың мамыр айында ол Мельбурнде өзінің отандасы Кори Нельсоннан ұтылып қалған болатын. Содан кейін бірде-бір рет жеңілістің кермек дәмін татқан емес.
Александр барлығы 25 кездесуде жеңіске жетіп, 15 қарсыласын айқын басымдықпен ұтты. 2016 жылдан бері UFC-де күш сынасып жүр. Арада үш жыл өткен соң Лас-Вегаста жергілікті файтер Макс Хэллоуэйді ұпай санымен ұтып, чемпиондық белбеуді иеленді. Содан кейін тағы бес рет өз атағын сәтті қорғады. Жасыл құрлықтың өкілі әр жылдары Шейн Янг, Мидзуто Хирото, Даррен Элкинс, Чед Мендес, Жозе Алду, Брайан Ортега, Чон Чхан Сон сынды саңлақтарды сан соқтырды. Ал атақты Хэллоуэйдің өзінен Волкановски үш мәрте басым түсті.
Атағы жер жарған Исраэль Адесанья мен Чарльз Оливейра үздік үштіктің санатында. 33 жастағы Исраэль 1989 жылы Нигерияда дүниеге келіп, кейіннен Жаңа Зеландияға қоныс аударды. Ол да дәл Александр Волкановски секілді өзінің спорттық карьерасында бір рет қана жеңілді. Былтыр көктемде Адесанья жартылай ауыр салмаққа ауысамын деп, польшалық Ян Блаховичке ұпай санымен есе жіберді. Өзге 23 жекпе-жегін тегістей ұтып, 15 қарсыласын нокаутқа жіберді. Қазіргі кезде ол – орта салмақтың чемпионы. Аралдық файтерден таяқ жегендер арасында Андерсон Сильва, Келвин Гастелум, Роберт Уиттакер, Йоэль Ромеро, Паулу Коста, Марвин Веттори және Джаред Каннонье сынды әлемге әйгілі спортшылар бар.
Жартылай орта салмақта күш сынасып жүрген 32 жастағы Чарльз Оливейраның аралас жекпе-жекке мықтап ден қойғанына 15 жылға жуықтады. Барлығы 42 рет октагонға шыққан ол 33 мәрте жеңіс тойын тойлап, 30 қарсыласын есінен тандырды. Ол джиу-джитсудың хас шебері. Қарсыластарының денін Чарльз қылқындырып тастағанын сан мәрте көзіміз көрді. Бұл жігіттен ойсырай ұтылғандар арасында Дональд Серроне, Ник Ленц, Энтони Петтис, Джим Миллер, Кевин Ли, Тони Фергюсон, Майкл Чендлер, Дастин Порье, Джастин Гэтжи және тағы басқалар бар.
Ал үздіктер тізіміндегі одан кейінгі орындарды Камару Усман (АҚШ), Фрэнсис Нганну (Франция), Леон Эдварс (Ұлыбритания), Алджамейн Стерлинг (АҚШ), Дастин Порье (АҚШ), Дейвесон Фигередо (Бразилия) және Иржи Прохазка (Чехия) иеленді.
