Партия төрағасының бірінші орынбасары Төлеутай Рақымбеков ұйымның жергілікті мүшелерімен бірге әуелі Галкин ауылдық округінде аялдап, халықтың мәселелеріне құлақ түрді. Былтырғы ауыл әкімдері сайлауында «Ауыл» партиясы атынан қатысып, жеңіске жеткен округ әкімі Дәурен Нұрсейітов атап өткендей, елді мекенді жаңғырту жұмыстары қолға алынған. Жергілікті мәдениет үйі, мектеп күрделі жөнделіп, ауылдың дәл ортасынан дене шынықтыру-сауықтыру кешені салынуда. Орта мектепте 117 оқушы бар.
Ауыл тұрғындары тұрмыстарының жаман емес екенін жеткізді. Мал өсіріп, соның өнімінен түскен табыспен күнелтеді. Ауылдың жас тұрғыны Манат Тайтұяқ ала жаздай сүттің мол сауылатынын, алайда оны қабылдайтын орын жоқ екенін айтты. Жергілікті жерде арнайы салқындатқыш бекет немесе жылжымалы цистерналар болса ауыл адамдары ағарғандарын соған тапсырар еді. Күніне Галкинде шамамен 2 тоннадай сүт сауылады. Ауыл әйелдері одан құрт-қаймақ, сары май жасап, қалаға апарып сатады екен.
Мұнда жайылымдық жерлерге қатысты мәселе жоқ. Ауылдық округке 131 мың гектар жер тиесілі болса, соның 76 мыңы – жайылымдық жер. Соңғы жылдары пайдаланылмай жатқан аумақтар қайтарылып жатыр.
«Төртінші деңгейлі бюджетке тәуелді Галкин сияқты ауылдарға түсетін қаражат өте аз. Салықтың санаулы ғана түрінен түсім ары кетсе 2-3 млн теңгеден аспайды. Бұл механизмді өзгерту керек. Қазақстан бойынша ауылдар шамамен 100 млн гектар жерді пайдаланып отыр. Олардан жиналатын салық көлемі 5 млрд теңгедей. Ал елімізде 2200 ауылдық округ бар. 5 млрд теңгені округтер санына бөлсек, небәрі 2 млн 300 мың теңгеден ғана келеді екен. Бұл азғантай ақшаға не істеуге болады? Шағын ғана футбол алаңын салуға кемінде 6 млн теңге қаражат қажет. Сондықтан осы бір қаржыландыру жүйесін жетілдіруге күш салатын боламыз», деп атап өтті Төлеутай Рақымбеков.
Арбаиген ауылында өткен саяси кеңес отырысында Президенттің биылғы Жолдауындағы ауылдарды өркендетуге қатысты тапсырмалары түсіндіріліп, оларды жүзеге асыру жолдары талқыланды. Партия төрағасының бірінші орынбасары былтырғы ауыл әкімдерін сайлау жүйесі өте сәтті бастама болғанын, нәтижесінде «Ауыл» партиясынан ұсынылып, сайланған ауыл әкімдерінің саны өзге саяси ұйымдардан басым түскенін атап өтті. Бүгінде халықтың 41 пайызы ауылдарда тұрады. Жолдаудағы бала капиталын дамыту, көпбалалы отбасыларды қолдау, елді мекендерде 650 медициналық пункт салу, балабақшалар мен мектептер тұрғызу секілді әлеуметтік бастамалар тікелей ауыл жұртының өмір сапасын көтеруге әсер етпек. Мемлекет басшысы Үкіметке жаңадан бюджет, салық және қала құрылысы туралы кодекстерді әзірлеуге тапсырма берді. Бұл құжаттар аталған салаларда қордаланып қалған мәселелерді шешетініне сенім мол.
«Ауыл шаруашылығын субсидиялау жүйесіне өзгерістер қажет. Қаражатты жанар-жағармай немесе тыңайтқыштың құнын субсидиялау үшін емес, өнімді өндіргені, өңдегені, сыртқа эскпорттағаны үшін тікелей өндірушілердің қолына ұстатқан дұрыс. Бүгінде агроөнеркәсіп кешеніндегі шаруашылықтарда қаражат жетіспейді. Осы мәселені шешсек, шаруашылық құрылымдарына жыл сайын жалпы құны 1 трлн теңгенің демеуқаржысы тиер еді. Бұған қоса біз ұсақ шаруашылықтардың бірігіп, кооперативтер құрғанын қалаймыз. Бүгінде елімізде мұндай құрылымдар көбейіп, шаруалар бірлесе дамудың игілігін сезіне бастады. Соның бір жарқын мысалы – Павлодар облысындағы «Ертіс Агро» кооперативі. Мұндай ұжымдасу қожалықтарға жанар-жағармай, тыңайтқыш сатып алғанда арзанға түседі әрі шағын шаруашылықтар үшін арман болған заманауи техникаларды тізгіндеуге мүмкіндік береді.
Пандемия азық-түлік өндірісінің маңызы аса жоғары екенін баршамызға ұғындырды. Биыл көктемде бидайдың тоннасы 180 мың теңгеге шарықтап шыға келгенін де көрдік. Осындай жағдайлар агрокешеннің болашағы зор әрі оған ақшаны ойланбастан салуға болатынын көрсетіп отыр», деді Төлеутай Сатайұлы.
Саяси кеңесте партиядан ұсынылып, сайланған ауыл әкімдері, атап айтқанда, жоғарыда аталған Галкин округінің әкімі Дәурен Нұрсейітов және Аққулы ауданындағы Қызылағаш ауылдық округінің әкімі Дастан Бейсенбаев өз аумақтарында өміршең етілген шаруалардың есебін берді. Сондай-ақ шешімін күтіп тұрған мәселелерімен бөлісті. Мысалы, Арбаиген ауылының кіреберіс жолын жөндеу, Қызылағаштағы Бесқарағай ауылына мәдениет үйі мен бау-бақшаға арналған су жүйесі қажет.
Павлодар облысы,
Шарбақты ауданы
