Фестивальда балалар, мұғалімдер және ата-аналар өздерін қызықтырған сұрақтарға жауап алып, жаңа оқу жылы басында ерекше тың жаңалықтармен шабыттанғанды. Фестивальға келушілер өз спикерін таңдауға және білім қуатына ие болуға, дәрістердің ақпараттық ағымына енуге, шеберлік сабақтарына дағдылануға, ғылыми шоуларды көруге мүмкіндік алды. Сондай-ақ фестиваль аясында оқушылар арасында роботтехника бойынша әлемдік чемпионат – First Global Challenge ұлттық кезеңінің финалы өтті. Жеңімпаз команда Женевада өтетін әлем біріншілігінде 160 елден 190-нан аса команда арасында Қазақстанның намысын қорғамақ.
Бүгінгі таңда STEAM-білім пәнаралық және қолданбалы тәсілдерді қолдануға, сондай-ақ барлық бес пәнді бірыңғай оқыту схемасына біріктіруге негізделген. Оқу-ағарту министрі Асхат Аймағамбетов: «SТЕАМ-білім балаларды технологиялық әлемге даярлайды. Болашақ мамандарға жаратылыстану ғылымдарының әртүрлі білім беру саласынан жан-жақты дайындық пен білім қажет. Балалар өз бетінше тәжірибе жасауды, жобалар жасауды ұнатады. Сондықтан ЅТЕАМ-дағдыларды дамыту оқудың бірінші жылынан басталады. Білім беру мазмұнын жаңарту шеңберінде жаратылыстану ғылымдары негіздері мен ақпараттық сауаттылыққа ерте оқытуды іске асыру жалғасып жатыр. Технологиялардың қарқынды дамуы арқылы жаңа мамандықтар пайда болуда, ЅТЕАМ мамандарының сұранысы барлық жерде өсуде», деді.
Ал қор басшысы Зарина Биюмбаева: «Біз PRO.NRG.FEST сияқты фестивальдар қазақстандықтардың ғылымға, жаңа технологияларға, білім берудің тиімді шешімдеріне деген қызығушылығын арттыруға мүмкіндік беретін үздік форматтардың бірі екеніне сенімдіміз. Біз Қазақстанда ең озық білім беру практикасын ілгерілететін жас ғалымдарды, ғылымды кеңінен танытушыларды, креативті педагогтерді бір алаңға біріктірдік», деді. Сондай-ақ ол екі жыл жұмысында 9 мың STEAM мұғалімінен тұратын қауымдастық құрылып, 200 мың педагог түрлі оқу бағдарламасымен қамтылғанын, халықаралық форматтағы 36 сертификатталған STEAM тренерлер даярланғанын және 126 мұғалімге STEAM авторлық оқыту бағдарламаларын жасауға көмектескенін атап өтті.
Өз кезегінде «Шеврон» еуразиялық бөлімшесінің басқарушы директоры Дерек Магнесс аталған фестиваль мүмкіндіктерді жасауға, өсіруге және кеңейтуге арналған алаң екенін, мемлекеттік органдармен, ҮЕҰ-мен, мектептермен, ЖОО-мен бірлесіп, инвестициялар салу арқылы адам капиталын нығайтуға ұмтылатынын мәлімдеді.
Балалардың белсенділігін арттыратын фестивальда TikTok әлеуметтік желісінде 1 млн жазылушысы бар қазақстандық химия мұғалімі Ұлан Үсенов далада көркем ғылыми шоу өткізді және химиялық тәжірибелер сиқырға ұқсас екенін дәлелдеді. Ал Италиядан келген мұғалім Пьетро Олла ғылыми эксперименттерді цирк және театр техникаларымен біріктіріп, балаларға нағыз қойылым ұйымдастырса, британдық ғалым Майкл Лондесборо біз өмір сүріп жатқан «пластикалық ғасыр» туралы айтып, зертханаларда ғалымдар қандай жаңа және берік материалдар мен полимерлер жасайтынын түсіндірді.
Белсенді талапкер, 12-сынып оқушысы Ерасыл Тәуекел құрдастарына NASA бағдарламасынан қалай өткенін және жасөспірімдерге ғарышты үйренуге болатынын айтса, Microsoft Kazakhstan-ның IT-сәулетшісі Санжар Мырзағалым жасанды интеллект және машиналар қалай ойлайтынын түсіндірді. Ал «Дарын» РҒПО басшысы Әнуар Оңайбеков Қазақстанда олимпиадалық қозғалыс қалай құрылғаны және кез келген оқушы олимпиада ойындарынан мансабын қалай бастап, әлемнің үздік ЖОО-ның есігін қалай ашуға болатыны туралы дәріс оқыды.
Фестивальда ата-аналар мен мұғалімдерді белсенділікке шақыру да назардан тыс қалмады. Қаржы кеңесшісі Медер Аматов ата-аналарға тіпті инфляция жағдайында да ЖОО-да оқуға ақша жинауға көмектесетін құралдар туралы ойын айтса, арт-кеңесші Влад Слудский шығармашыл балалар үшін жаңа перспективалар ашатын ғылым мен өнердің симбиозы туралы дәріс оқыды. Бизнес-жаттықтырушы Аркадий Цукер алға жылжуға және мақсаттарға жетуге көмектесетін жүйелі ойлау туралы тренинг өткізді. Таиландтағы Оңтүстік-Шығыс Азия Білім министрлерінің ұйымы жанындағы өңірлік STEM-білім беру орталығының SEAMEO STEM-ED сарапшыларының педагогтары үшін арнайы шеберлік сабақтары өтті. Олардың қарқынды бағдарламасы 36 қазақстандық мұғалімге STEM-оқыту қағидаттарын үйренуге және өз сабақтарында жаңа әдістемені енгізуге көп көмектесті.
«РФММ» КеАҚ басқарма төрағасының орынбасары Алмас Ордабаев мектептерді балалардың жан-жақты дамуына мүмкіндік беретін шығармашылық зертханаларға айналдыру туралы айтып өтсе, байланыс жөніндегі сарапшы Латина Сатарова мұғалімнің жеке бренд құрып, өзінің медиа жұмысы туралы қалай сөйлесетіні жайында дәріс оқыды.
Сондай-ақ креативті мұғалімдердің арнайы көрмесі өтіп, онда қазақстандық үздік педагогтардың ғылыми STEAM-жобалары мен білім беру шешімдері ұсынылды. Тіпті ең іш пыстырарлық тақырыпты қызықты түрде үйретуге болатыны жөнінде, яғни ортағасырлық ноу-хау мен өнертабыстарды заманауи стартаптар мен әзірлемелермен салыстыра отырып, Қазақстан тарихы туралы Жанат Рахмани дәріс оқыды. Математика және информатика пәнінің мұғалімі Бегайым Мұрат интерактивті сабақ өткізіп, жасанды интеллектіні жануарларды тануға қалай үйрету керектігін көрсетсе, биотехнолог Жанар Нұртөлеу адам ағзасы энергияны қалай өндіретінін және ағзада тағы қандай таңғажайып биохимиялық процестер жүретінін түсіндірді.
