Биыл жылыту маусымына дайындық наурыз айында басталған. Қазір бұл тарапта күн сайын талдау жасалып отыр.
Мәселен, кейінгі 4 айда елордаға 75 мың тонна көмір жеткізілген. Бұл көрсеткіш әкімдік мәлімдеген қажеттіліктен екі есе жоғары (37 мың тонна). Ал, қыркүйек айына коммуналдық-тұрмыстық сектор мен тұрғындар үшін көмір өніміне қажеттілік жоспары 67 мың тоннаны құрайды. Бүгінде бұл көлемнің жартысы бас қалаға жеткізілген.
Көктал ауданында орналасқан «Бек-Айда» ЖК көмір қоймасының сыйымдылығы 12 вагонды құрайды.
«Былтыр күн сайын 150-200 көмір тиелген көлік жөнелтілді. Көмір бірден вагоннан сатылды. Сәйкесінше, ұзын-сонар кезек болды. Қазір мұндай дүрбелең жоқ. Азаматтар жаз мезгілінен бастап көмір сатып алуда. Сонымен қатар газдандыру жұмыстары да белсенді жүргізілуде. Бүгінде халықтың 50-60 пайызы көмір сатып алған», дейді көмір қоймасының меңгерушісі Дулат Құсайынов.
Айта кетейік, темір жол тұйықтарында Майкөбе көмірінің бір тоннасы 12 500 теңгеден, Шұбаркөл көмірі – 13 800 теңге және Қаражыра көмірі 14 500 теңгеден сатылып жатыр.
