Еуразиялық экономикалық одақ құру жөнінде келісім жобасы әзірленді

АСТАНА. 15 мамыр. Мәскеуде Еуразиялық экономикалық одақ құру туралы келісім жобасын дайындауға байланысты кеңес өтті. Оған Үкімет басшысының бірінші орынбасары Бақытжан Сағынтаев қатысты. Бұл туралы primeminister.kz хабарлады. Еуразиялық экономикалық комиссия кеңесі отырысында белгілі болғандай, басты құжат – келісім жобасы жан-жақты талқыланып, тараптар ортақ мәмілеге келді. Енді ішкі мемлекеттік процедураларды жүргізу керек. Сондай-ақ, құжат мәтіні мемлекеттік тілге аударылады. Естеріңізге сала кетейік, Астанада алдағы 29 мамырда Қазақстан, Ресей, Беларусь елдерінің басшылары Еуразиялық экономикалық одақ құру туралы келісімге қол қояды. Аталған келісім-шарт үш елдің экономикасына, яғни, көлік, энергетика, агроөнеркәсіп салаларының  тең құқықты дамуына, шынайы бәсекелестікті өрістетуге зор ықпалын тигізеді деп күтілуде. Б.Сағынтаев: «Біздің бірлескен жұмысымыз «үштіктің» арасындағы интеграцияның жоғарғы деңгейде екенінің көрінісі, тең құқықты әріптестік қатынас әлеуетін тиімді пайдалануға ниетті екенімізді атап өтуге тиіспін», – деді. Жолдыбай Базар. Дереккөз: primeminister.kz. Фото: remarka.kz.