Экономикадағы әйелдер рөлі

2014 жылдың 21-23 мамыры күнде­рі VII Астана экономикалық форумы аясында (АЭФ) «G-Global – жаңа экономикадағы әйелдер рөлі» атты халықаралық әйелдер форумы өтеді. Астана экономикалық форумы әлемдегі ауқымды халықаралық форумдардың бірі болып табылады. Ол жыл сайын қазіргі заманның негізгі экономикалық және әлеуметтік мәселелерімен күресу жолдарын іздестіру мақсатында жаһандық көшбасшыларды, сарапшыларды және қоғам мен бизнес-қауымдастықтар өкілдерінің басын қосады. Жыл сайын Астана әлемдік экономикалық проблемаларды шешу үшін әлемнің әр түкпірінен көрнекті әрі беделді сарапшыларды қабылдайды. Астана экономикалық форумы аясында Қазақстанның Іскер әйелдер ассоциациясы 2012 жылдан бастап дәстүрлі түрде әйелдер форумын өткізіп келеді. Осы форум аясында тұрғындардың, оның ішінде әйелдердің өмір сүру сапасын жақсартуға қатысты барлық өзекті және маңызды мәселелер талқыланады. «Осындай іс-шараны тұрақ­ты түрде өткізіп тұру идея­сы Мемлекет басшысы Н.Ә.На­зар­баев­тың дәстүрлі халыққа Жол­­дауын зерттеу барысын­да пайда болды», дейді ұйым­дас­тыру­шылар. Жолдауда қоғам дамуын­дағы әйелдердің маңызды рөлі, эко­номиканың сәтті дамуы, әлеуметтік шиеленістің төмендеуі мен тұрғындардың өмір сүру деңгейінің артуы үшін шағын және орта бизнес, соның ішінде әйелдер кәсіпкерлігінің маңыздылығына ерекше көңіл бөлінген. Әлемдегі халықтың 50 пайыз­дан астамын әйелдер құрайды және олардың өзі тұратын, балалары өмір сүретін қоғамға көзқарасы немқұрайлы емес. Әйелдер құ­қық­тары мен мүмкіндіктерін кеңей­туге қажетті шарттарды мойын­дап, қамтамасыз етуші елдер дұ­рыс бағытта келеді. Қазақстан Рес­­пуб­ликасының гендерлік тең құ­­қық­тық мәселесіндегі жетіс­тік­терін халықаралық қауым­дас­тық мойындаған. 2013 жылы жүр­гі­зілген жыныстық тең құқықтық дең­гейі рейтингінде Қазақстан 136 ел ара­сында 32-ші орынға ие бол­ды.   Елбасының бастамасымен әйелдер және олардың қоғамдағы орнын жақсарту жөніндегі әйелдер қозғалысын қолдауы нәтижесінде жұмыспен қамтылу, әйелдердің кәсіпкерлігі мен саяси көшбасшылығын дамыту мәселелері елдің бағдарламалық құжаттарында да көрініс тапты. Қазір Қазақстанда барлық салалардағы әйелдердің белсенділігі жоғары. «G-Global – жаңа экономикадағы әйелдер рөлі» халықаралық әйелдер форумының мақсаты – әйелдер әлеуетін дамыту, инвестиция мен инновацияларды тарту, сонымен қатар Астанада болатын ЭКСПО-2017 көрмесіне әлемнің әйел-кәсіпкерлерін қатыстыру үшін жүйелі түрде дайындық жұмыстарын жүргізу. Форум бағдарламасы екі секциядан құралған – «Әйелдердің саяси және экономикалық мүмкіндіктері» және «Орталық Азия және Ауғанстан әйелдерінің рөлі». Форумда ашық пікірсайысқа көрнекті сарапшылар мен қонақтар қатысады. Форум жұмысына Ауғанстанның әйел істері жөніндегі министрі – Хасан Бану Газанфар, Қырғыз Республикасы Парламенті депутаты – Алтыбаева Айнуру, Өзбекстан Республикасы Заң шығарушы палатасы Мәжіліс депутаты – Ниязова Жамила, Түрікменстан Республикасы Мәжіліс депутаты – Казакова Джерен, Қазақстан Республикасының Украинадағы құрметті консулы – Маслюк Галина және басқалар қатысады. Форум аясында Ассоциация әлемдік сарапшылар мен әйелдер қозғалысы көшбасшыларының шеберлік-сыныптары мен танымал бизнес-жаттықтырушылардың тренингтерін ұйымдастырады. Форум соңында шетелдік әріптестер және кәсіпкерлер ынтымақтастық туралы келісімдерге, меморандумдарға қол қояды. Бұл ЭКСПО-2017 көрмесіне және біздің елдегі бизнестің дамуына әлемдік кәсіпкерлер секторының қызығушылығын арттыра түседі. «Егемен-ақпарат».