Тиімді саясат алдын алу әдістеріне негізделуі тиіс

«Нұр Отан» партиясының 2015-2025 жылдарға арналған жемқорлыққа қарсы жаңа іс-қимыл бағдарламасының жобасы қалың бұқараның талқысына ұсынылмақ «Нұр Отан» партиясы Орталық ап­па­ратында партия Төрағасының бірін­ші орынбасары Бауыржан Байбектің қатысуымен «Нұр Отан» партиясының Жемқорлыққа қарсы іс-қимыл бағ­дар­ламасын әзірлеу жөніндегі жұмыс тобының отырысы болып өтті. «Нұр Отан» 2015-2025 жылдарға арналған жемқорлыққа қарсы жаңа іс-қимыл бағдарламасын әзірлеуде. Жемқорлыққа қарсы жаңа іс-қимыл бағдарламасының жаңа жобасы заңнаманы жетілдіру, жемқорлық әрекеттердің алдын алу, қоғамда жемқорлыққа қарсы мәдениет пен жемқорлыққа төзбеушілікті қалыптастыру, жемқорлықпен күреске азаматтық қоғам институттарының қатысуы мүмкіндігі мен Қазақстанның көпшілік мақұлдаған халықаралық актілерге қосылуын заңнамалық қамтамасыз ету салаларындағы жұмыстарды қамтиды. Бағдарламаның жаңа жобасында мемлекет пен азаматтардың тең әріптес ретінде сапалық тұрғыдан жаңа сипаттағы өзара қарым-қа­тынасты қалыптастыру бойынша қоғаммен, азаматтық сектормен ынтымақтастығына ерекше назар аударылып отыр. Бағдарлама шең­берінде «Нұр Отан» партиясының «Жемқорлыққа қарсы іс-қимыл туралы» жыл сайынғы баяндамалары, сонымен қатар, нақты нәтижелер бойынша есептері тәжі­рибесін енгізу ойластырылған. Олар қоғам, ҮЕҰ мен мемлекеттік құры­лымдардың өкілдерімен бір­лесіп әзірленеді. Аталмыш құжат­тар жемқорлықпен күрес сала­сын­дағы жағдайды толық көрсе­тіп, жемқорлық құқық бұзушы­лықтардың саны туралы, жемқор­лықтың деңгейін бағалау бойын­ша, сондай-ақ, жемқорлыққа қарсы іс-қи­мыл­да қолданылатын шаралар ту­ралы ақпарат ұсынып тұратын болады. «Қолымызда қажетті мүм­кін­діктердің барлығын, кадрлық, ұйым­дастырушылық ресурстардың жеткілікті екендігін атап өткен жөн. Мемлекетте, қоғамда қажеттілік туып отырғанда коррупцияға ымы­расыздықтың қоғамдық санаға дендеуі үшін ұзақ мерзімді және белгілі бір мақсатқа негізделген нақты бағдарлама бойынша жүйелі түрде жұмыс жасауымыз керек», деп атап өтті жұмыс тобының отырысы барысында «Нұр Отан» партиясы Төрағасының бірінші орынбасары Бауыржан Байбек. Жемқорлық жайттарының бой көрсетулерімен ғана емес, сондай-ақ, оның себептерімен күресуге бағытталатын жүйелілік – жаңа бағдарламаның басты қағидасына айналады. Ұлыбритания, Фран­ция, Сингапур, Малайзия және Гон­конг секілді бірқатар елдердің тәжі­ри­бесіне жүргізілген талдау көрсетіп отырғандай, жемқорлыққа қарсы күрестегі тиімді саясат міндетті түрде алдын алу әдістеріне негіз­делуі керек. «Жемқорлыққа қарсы іс-қимыл мәселесі мемлекеттік саясаттағы стратегиялық бағыт болып табылады. Бұл туралы Мемлекет басшысы, партия Төрағасы Н.Ә. Назарбаев талай мәрте айтты. Әлеуметтік кеселмен күрестің жаңа әдістерін уақыттың өзі айқындап беруде, енді аталмыш бағдарламаны жасау қажеттілігі туды, әрі оның маңыздылығын шетелдердің оң тәжірибесінен көрініп отыр», – деп атап өтті жұмыс тобының отырысында қоғамдық кеңестің төрағасы Қайырбек Сүлейменов. «Бұл құжат елімізде, ең алды­мен, мемлекеттік қызметте бар­лық жем­қорлық көріністерді азайтуға жүйелі түрде қарауға мүмкін­дік береді. Басты тірек азамат­тық қоғам институттарына жасалып, сондай-ақ, жемқорлық әрекет­тер қоғамның құқықтық мәдение­тіне, нақты тұлғалардың құқық­тық мәдениетіне қатысты болғандықтан, бағдарламада қоғам мен мемле­кетте жемқорлыққа қарсы мәде­ниетті дамытуға үлкен мән беріл­мек», – деді ҚазГЗУ қылмыс­тық-процессуалдық зерттеулер мен жемқорлыққа қарсы іс-қимыл ҒЗИ директоры Марат Қоғамов. 2015-2025 жылдарға арналған жемқорлыққа қарсы жаңа іс-қимыл бағдарламасының жобасы қоғам, интернет пайдаланушылар, сарапшылар, үкіметтік емес ұйымдар мен партия мүшелері тарапынан талқыланып, ұсыныстар енгізу үшін партияның ресми сайтында жарияланатын болады. «Егемен-ақпарат».