Коллажды жасаған Амангелді Қияс, «EQ»
Зерттеу негізінде бірыңғай жастар тұрғын үй бағдарламасының арнайы жобасы әзірленеді. Аталған зерттеу жұмысына негіз болған «Жастар» ғылыми-зерттеу орталығының арнайы жүргізген сауалдамасындағы «Сіздің ойыңызша, жастар өздерін сенімді сезініп, дамуға қабілетті болу үшін не қажет?» деген сұраққа респонденттердің 40,9 пайызы «Өз баспанасы» деп жауап берген. Өз кезегінде «Отбасы банк» АҚ өңірлік әкімдіктермен бірлесе отырып, жастарға арналған дербес бағдарламаларды іске қосуда. Бұл – «Елорда жастары», «Алматы жастары», «Қарағанды жастары», «Әулиеата жастары», «Қостанай жастары». Жақын арада осындай бағдарлама Атырауда да («Атырау жастары») жүзеге аспақ.
Өңірлік тұрғын үй бағдарламаларына қатысу үшін іріктеу критерийлері әр өңірге байланысты өзгеріп отыруы мүмкін. Несие беру шарттары әдетте стандартты болып табылады: бастапқы жарна кемінде 10 пайыз болу керек, несие мөлшерлемесі жылдық 5 пайыз, несие мерзімі 19 жылға дейін.
Жастардың бірыңғай тұрғын үй бағдарламасының жобасын әзірлеу «Жастар» ғылыми-зерттеу орталығы мен «Отбасы банк» АҚ қол қойған ынтымақтастық туралы меморандум негізінде жүзеге асады.
Еліміздегі статистикаға сүйенсек, 18 бен 29 жас аралығында жастардың саны 4,5 миллионға жуық. Ал енді аталған санатқа жатпайтындар қайтпек? Белгілі болғандай, «Отбасы банкінде» 2003 жылы банк ашылғалы жинақ жүйесі жүргізіледі. Азаматтар өз атынан есепшот ашып, кемі үш жыл ішінде алғысы келетін үй құнының 50 пайызын жинап бітірсе, бағалау көрсеткішін белгілі бір мөлшерге жеткізсе (ең төменгісі 16), онда 5 пайыздан 3,5 пайыз аралығында үйді несиеге рәсімдей алады. Бұл – жалпыға қолжетімді бағдарлама. Жинақ жасау уақыты мөлшеріне келсек, әркім қалтасына қарай көсіледі. Ең төменгі мерзім үш жыл болып саналады. Үйді несиеге рәсімдеуге 18 жастан асқан азаматтың кемінде 6 айлық табысы болуы талап етіледі. «Табыс көзін растаған 18 жастан асқан азамат үй алуы үшін ата-анасы жастайынан атына есепшот ашып, ақша салып отырса, уақытты азайта алады», дейді мамандар.
