Қаржы • 22 Қыркүйек, 2022

Уәкілетті экономикалық операторлардан 59,5 млрд теңге өндірілді

147 рет
көрсетілді
1 мин
оқу үшін

Мемлекет басшысының Қытаймен кедендік шекарада тәртіп орнатуға қатысты тапсырмасын орындау барысында 10 уәкілетті экономикалық оператордан бюджетке 59,5 млрд теңге өндірілді, деп хабарлайды Egemen.kz Мемлекеттік кірістер комитетіне сілтеме жасап.

Уәкілетті экономикалық операторлардан 59,5 млрд теңге өндірілді

2022 жылдың ақпан-мамыр айларында мемлекеттік кірістер органдары 10 уәкілетті экономикалық операторға қатысты жоспардан тыс көшпелі кедендік тексерулер жүргізген болатын.

Кедендік тексеру нәтижелері бойынша 107,7 млрд теңге мөлшерінде кедендік төлемдер, салықтар мен өсімпұлдар қосымша есептелді. Уәкілетті экономикалық оператор тауарлардың кедендік құнын дұрыс төмендетіп көрсету арқылы кедендік төлемдер мен салықтарды төлеуден жалтармақ болған.

Анықталған бұзушылықтар фактілері бойынша мемлекеттік кірістер органдары прокуратура және сыбайлас жемқорлыққа қарсы қызмет органдарымен бірлесіп мемлекет бюджетіне 59,5 млрд теңге мөлшерінде кедендік төлемдер, салықтар мен өсімпұлдар сомасын өндіріп алды. Оның ішінде, ерікті түрде төленгені - 56,9 млрд теңге, мәжбүрлеп өндіріп алу шараларының нәтижесінде өндірілгені - 2,5 млрд теңге.

Қазір мемлекеттік кірістер органдары уәкілетті экономикалық операторларға және кедендік төлемдер мен салықтарды төлеу бойынша ортақ міндет атқаратын кеден өкілдеріне қатысты берешекті өндіріп алу шараларын қабылдау бойынша жұмысты жалғастырып жатыр.