Dr.Web компаниясының Орталық Азиядағы бас директоры Илья Дыбовтың айтуынша, қазір әлемдегі веб-қауіптердің көлемі қарқынды түрде өсіп келеді. Сол себепті қауіпсіздік жүйесіне жіті көңіл бөлген дұрыс дейді ол.
«Қазір IT-дің енбеген саласы қалмады. Сәйкесінше, әлемде бұған байланысты қауіптің түрі де көбейіп жатыр. Бұл әртүрлі сипаттағы «трояндық» вирустардан бастап алаяқтардың әрекеттеріне дейін қамтиды. Әсіресе жеке деректерге қатысты қауіп-қатер азаймай тұр. Бұл проблемамен корпоративтік және жеке желілердің пайдаланушылары бетпе-бет келуде. Біз осы бағыттағы тәжірибемен Абай облысының тұрғындарымен бөліскіміз келеді», деді И.Дыбов.
Антивирустық зертхананың өкілдері ақпараттық қауіпсіздік мәселесінің өзектілігі уақыт өткен сайын артып бара жатқанын айтады.
«Антивирустық жүйелер – осы бағытта көрсетілетін қызметтің бір тармағы ғана. Ақпараттық қауіпсіздік мүлдем басқа сала. Сондықтан пайдаланушылардың бұл жөнінде толыққанды біліммен қамтылуы өте маңызды деп санаймыз. Тек адамдардың білімі мен хабардарлығы жеке деректердің 100% қорғалуына мүмкіндік береді», деді Dr. Web компаниясының басшысы.
Жаңадан ашылған зертханада вирусқа қарсы бағдарламалық жасақтаманы әзірлеуден бөлек, барлық дербес компьютер пайдаланушыларына ақпараттық қауіпсіздікке арналған курстар өткізіледі деп жоспарланған.
