«2022 жылдың бірінші жартыжылдығында ішкі туристер саны 3,6 млн-ға жетті. Оның ішінде 2,7 млн турист қонақүйлерге жайғасса, 300 мың саяхатшы ұлттық парктерге барған. Бұл көрсеткіш былтырғы жылдың сәйкес кезеңімен салыстырғанда 50% жоғары. 2021 жылдың алғашқы жартыжылдығында Қазақстанға 2,4 млн адам келген болатын. Сондықтан жыл соңына қарай ішкі туристер саны 8 млн адамға дейін өседі деген болжам бар.
Пандемияға дейінгі кезеңмен салыстырсақ, орналастыру орындары көрсететін қызмет көлемі де өскен. 2019 жылдың жартыжылдығы бойынша қызмет көлемі 51 млрд теңге болса, биыл бұл көрсеткіш 30%-ға артып, 68 млрд теңге болды. Орналастыру орындарының толуы биылғы жылдың 6 айының қорытындысы бойынша 28,2% болды, бұл – 2019 жылдың көрсеткішінен жоғары (27%). Мұндай қарқынмен жыл соңына дейін көрсеткіш 32% болады деп болжап отырмыз», дейді Д.Рысбеков.
Індет шектеулері алынып тасталғандықтан, шетелдік қонақтардың келуі де бірте-бірте өсіп келеді. Осы жылдың жартыжылдығының көрсеткіші былтырғы жылдың қорытындысымен теңесіп, 1,3 млн келушіге жетті. Жыл соңына қарай олардың саны 2,5 млн-ға жетуі мүмкін.
Биылғы 6 айда қонақүй қызметін пайдаланған шетелдік туристер саны былтырдың осы кезеңімен салыстырғанда 2,5 есеге артқан. Мәселен, 2022 жылдың 1 жартыжылдығында 292 мың адам қонақүйге жайғасса, 2021 жылдың 1 жартыжылдығында олардың саны 123 мың адам болған еді. Биыл елімізге 700 мың қонақ келеді деп күтілуде.
«eQonaq жүйесінің талдау деректеріне сүйенер болсақ, апта сайын Қазақстанға кем дегенде 11 мың шетелдік турист келеді. Орналасуы бойынша шетелдіктердің жиі тіркелетін өңірлері: Алматы, Астана және Маңғыстау облысы. Тамыз айының өзінде ақпараттық жүйеде 52 мың шетелдік турист тіркелген. Қазіргі күні eQonaq қамтуы 10 мың орналастыру орнын құрайды. Эпидемиялық ахуал мен шекарадан өтуге карантиндік шектеу шаралары, қаңтар оқиғасы, сондай-ақ әлемдегі экономикалық және саяси жағдай шиеленіскендіктен сырттан келетін туристердің көрсеткіші пандемияға дейінгі көрсеткішке әлі жеткен жоқ», дейді спикер.
UNWTO болжауынша, халықаралық туризм 2024 жылға қарай қалпына келеді. Дегенмен әлемдік туризм ойыншылары агрессивті саясат жүргізіп, шетелдік туристке деген талас күшейіп жатыр.
Биыл 74 елдің азаматтарына визасыз режім қалпына келтірілді. Қосымша Үндістан, Қытай және Иран азаматтарына да визасыз режім қосылды. 113 бағыт бойынша 28 елмен халықаралық әуе қатынасы қалпына келтірілді.
Сондай-ақ шетелдік туристердің жиі келуіне себеп болатын құралдардың бірі – халықаралық атаулы іс-шаралар екені белгілі. Мәселен, биыл Астанада әйгілі IRONMAN жарысы ұйымдастырылды. Оған әлемнің 40 елінен 2 мыңнан аса қатысушы келді. Мамандардың есебі бойынша, жарысқа қатысушылардың қонақүй жалдау, тамақтану, ойын-сауық бағдарламалары, кәдесый және тағы басқа шығындарынан ел бюджетіне 1 млрд теңге түскен.
«Туризмге инвестиция тарту жұмысы да жалғасып жатыр. Соның нәтижесінде, жыл басынан бері 20,3 млрд теңгеге 77 жоба жүзеге асырылды. 2022 жылдың соңына дейін қосымша 107,8 млрд теңгеге 87 жоба іске қосылады деп күтілуде. Қонақүй бизнесі туристік саланың негізгі жүйесін құрайды. Сондай-ақ туризм нысандары көптеп жұмыс орындарын ашады. Мәселен, WYNDHAM GARDEN BURABAY жаңа қонақүйі 120 жаңа жұмыс орнын, Абай облысындағы Alakol Love демалыс орны 100 адамды жұмыспен қамтыды», дейді Туризм индустриясы комитетінің төрағасы.
1 маусымда өткен Үкімет отырысында Мәдениет және спорт министрлігіне Neo Nomad 2022 ауқымды акциясын өткізу ұсынылған болатын. Жобаның мәні –Қазақстан ішінде ішкі және шетелдік туристердің келуіне ұсынылатын 20 локацияның тізімін қалыптастыру болатын. Акцияға қатысу үшін туристер арнайы суретке түсіп, фотосуреттерін #neonomad2022 белгісімен әлеуметтік желілерде орналастыруы керек болатын. Іс-шара аясында Қазақстанның 20 өңіріндегі танымал локацияларға барған белсенді туристер марапатталады. Қазіргі уақытта өңірлердің туристік локацияларында фотожақтау (фоторамка) орнату жұмыстары жүріп жатыр.
Жиын соңында Дастан Рысбеков биылдан бастап жүзеге асырылған ел ішінде балаларға тегін әуе сапарын сыйлайтын Kids Go Free бағдарламасының аралық қорытындысына тоқталып өтті. «Күні бүгінге дейін 1 мыңнан аса бала туристік пакет аясында тегін ұшып-қону мүмкіндігін пайдаланды. Жоба аясында туроператорлар 320 млн теңгеден аса сомаға туристік өнімді жүзеге асырды. Қазіргі таңда Kids Go Free бағдарламасы бар турларға сұраныс артып жатыр. Жыл соңына дейін кем дегенде 2 мың баланы қамту жоспарланып отыр», деді Дастан Рысбеков.
