Топтан шығу қиын болғалы тұр

Биылғы әлем чемпионатында Дарко Добресков жетекшілік ететін Қазақстан құрамасы «С» тобында АҚШ (Токио Олим­пиадасының жеңімпазы), Сер­бия (2018 жылғы әлем чемпио­ны), Германия (Еуропа чем­пионатының екі дүркін күміс жүлдегері), Болгария (Еуропа чемпионы) және Канада (Па­намерика ойындарының қола жүлдегері) секілді азулы құ­рамалармен бір топқа түскен еді. Біздің топтағы АҚШ пен Сербия құрамасы мамандар тарапынан тек «С» тобының ғана емес, осы жылғы әлем біріншілігінің негізі фаворит­тері екені айтылып жатыр.

Волейболдан әлем чемпио­натының тарихына көз жү­гіртер болсақ, Қазақстан қыз­дар құ­рамасы байрақты бә­секеге 2006 жылдан бері тұ­рақ­ты түрде қатысып келеді. Әзір­ге ең үздік көрсеткіші – 15-орын (2014 жыл). Биылғы чем­пионатта ел намысын мына ойыншылар қорғап жатыр: Мәдина Бекет, Томирис Са­ғым­баева, Кристина Бе­лова, Сәбира Бекішева, Динара Қо­жан­бердина, Найля Ниг­ма­ту­лина, Елизавета Мейс­тер, Мар­гарита Бельченко, Ека­тери­на Михайлова, Татьяна Ни­ки­тина, Яна Петренко, На­талья Смир­­нова, Валерия Чу­мак және Анас­­­тасия Коломоец.

Әлем чемпионатының ере­жесі бойынша 24 құрама бірінші айналымда алты-алты құрамадан төрт топқа бөлініп, бір реттен бір-бірімен ойнап шығады. Бұл кезеңдегі ойын­дардың бәрі Арнхем қала­сындағы «Гель­­редом» стадионында өтіп жатыр.

Алғашқы айналым аяқталған соң, әр топтағы үздік 4 құрама 2-айналымға жолдама алады. А және D тобындағы төрт команда Е тобына түсіп, Нидерландта ойнайды. Ал В мен С квартетінің үздіктері F себетіне түсіп, Поль­шада шеберлік байқасады. Мұн­да 1-айналымда ойнаған құ­ра­малардың жолы қайта түйіс­­­пейді. Ол үшін алғашқы ке­зеңнен соң рейтинг түзіледі. Нәти­жесінде, 2-айналымда әр топтан 4 ұжым шешуші сын­ға жолдама алады. Мұнда олар ши­рек финалдан бас­тап олим­пиадалық жүйемен кім мықтыны анықтайды.

Биылғы чемпионаттың бірін­ші айналымында Қазақстан құ­рамасы ең алғаш азулы АҚШ волейболшыларымен шеберлік байқасып, 3:0 есебімен жеңіліп қалды. Қазақстандық қыздар алғашқы кезеңде қарсыластарына 16:25 есебімен жол берсе, кейінгі екі сетте 13:25 және 22:25 есебі­мен ұтылып қалды. Екінші турда Германиямен кездескен жер­лестеріміз бұл жолы да дәл сондай есеппен қарсыластарына есе жіберді – 15:25, 18:25, 21:25.

Өзге топтағы нәтижелерге тоқ­талар болсақ, үш турдан кейін «А» тобында Италия, «В» тобында Доминикан Республикасы және «D» тобында Бразилия мен Қытай құрамалары 9 ұпаймен көш бастап келеді.

Кеше Канада құрамасымен кездескен отандастарымыз бүгін Сербиямен, ертең соңғы турда Болгария волейболшыларымен ойнайды.