«Шындықтың шырақшысы, намыстың найзағайы» атанған Халық жазушысы Шерхан Мұртаза көзі тірі болса биыл 90 жасқа толар еді. Қазақ сөз өнерінің өрістеуіне өрелі үлес қосқан ерен тұлғаны шығармашыл қауым жыл сайын үлкен сағынышпен еске алады. Есте болса, Шерағаңа арналған бильярд турнирін өткізу ісіне жазушының 85 жылдық мерейтойы қарсаңында «Егемен Қазақстан» газетінің басшылығы бастамашы болды. Сол кезде Шерағаң денсаулығына байланысты турнирге келе алмаса да, игі идеяны қолға алған інілеріне ризашылығын білдіріп, батасын берген еді. Содан бері дәстүрлі турнир үзбей жалғасын тауып келеді.
Биыл Алматы қалалық Қоғамдық даму басқармасы мен Өңірлік коммуникациялар қызметі бірлесе ұйымдастырған жарыста БАҚ өкілдері бақ сынады. «Динамикалық пирамида» қағидаты бойынша өткен бильярд турниріне 30-дан астам журналист қатысып, жарыс талабына сай әр редакциядан екі ойыншы өнер көрсетті. Жарты күнге созылған қызу бәсеке барысында аға буын тарапынан Шерхан Мұртаза жайлы жарқын естеліктер айтылды.
– Шерхан аға, шүбәсіз қазақ әдебиетінің майталманы. Оның қаламынан өрілген әр шығармадан уақыт үні естіледі. Әдебиет пен журналистиканың көшін қатар алып жүрген тағылымды тұлға, қайраткерлік қырымен де жұрт жадынан берік орын алды. Биік мінбелерден ұлттың жоғын жоқтап, әділеттің ақ туын жоғары ұстады. Бүгінгі бильярд турнирін осы бір кемеңгер тұлғаның көңіл сыры, өмір жыры жайлы ізгішуақ естеліктер айтылған рухани жүздесу деп есептеймін, – дейді турнирге қатысқан Әл-Фараби атындағы Қазақ ұлттық университеті Журналистика факультетінің профессоры Аязби Бейсенқұлов.
Шер-ағаңның сүйікті ойыны болған тастаяқ алматылық зиялы қауымның басын қосатын игі жобаға айналғанын айта кету керек. Жарысқа қатысушылар әсіресе шығармашылық адамы үшін бұл ойынның пайдасы зор екенін тілге тиек етті.
Турнир қорытындысына сай «Қазақ радиолары» командасы көш басынан көрінсе, «Алматы» телеарнасының журналистері екінші орынды еншіледі. Ал үздік үштікті Tengrinews ақпараттық сайтының тілшілері түйіндеді. Еске салсақ, екі апта бұрын Алматыда Бұқаралық ақпарат құралдары өкілдерінің қатысуымен Шерхан Мұртаза атындағы футбол турнирі мәреге жеткен болатын.
АЛМАТЫ
