Білімдіге жол ашық

– Биыл облыс әкімінің білім гранты 107 түлекке берілді. Әкім грантын иеленгендердің дені – бо­лашақ мұғалімдер мен дәрі­герлер. Олардың ішінде 32 тү­лек М.Оспанов атындағы Батыс Қазақстан мемлекеттік медициналық университетіне, 19 өрен С.Асфендияров атын­да­ғы Қазақ ұлттық медицина университетіне оқуға түсті. Ал Т.Жүргенов атындағы Қазақ ұлт­тық өнер академиясына білім алу грантына 5 жас ие болды, 9 жас «Нұр-Мүбарак» Египет ислам мәдениеті университетіне, 40 түлек Х.Досмұхамедов атындағы Атырау университетіне, 1 түлек М.Өтемісов атындағы Батыс Қа­зақстан мемлекеттік уни­вер­­ситетіне, тағы бірі Қазақ ұлттық қыз­дар педа­го­гикалық уни­вер­ситетіне оқуға қабыл­данды, – дейді А.Дүйсекенова.

Әкім грантын иеленбесе де өз білімімен шетелдегі үздік оқу орнына оқуға қабылданғандар бар. Мәселен, Атырау қала­сын­да­ғы Білім-инновация лицей-интернатының биылғы түлегі Ризабек Алпамыс ҰБТ-дан 132 балл жинаған еді. Ол Оңтүстік Кореядағы Ulsan National Institute of Science and Technology (UNIST) жоғары оқу орнына оқуға түсті. Өйткені талапты жас аталған ел­дің ғылыми-зерттеу және тех­но­логия университеті мен Гон­конг­тағы ғылым және технологиялар университетінен оқуға шақырту алған.

Былтыр Ризабек Алпамыс Еуро­палық физика олимпиадасынан күміс, биыл Азия олимпиадасынан қола медальды қоржынына басты. Ал 2021-2022 жылдары ха­лықаралық физика олимпиадасынан екі мәрте күміс медаль, биыл О.Жәутіков атындағы ха­лық­аралық олимпиададан алтын медаль иемденген.

– Менің алға қойған мақсатым бар. Бұл – жаңа технологиялар­ды ойлап табуға үлесімді қосу. Қазақстандағы ғылым мен техника саласын дамытуға атсалысуды көздеп жүрмін. Сол себептен, бос уақытымда түрлі бағ­дарламаны құрастырғанды, футбол ойнағанды жақсы көре­мін. Бірақ уақытымның көбін ғы­лым­мен айналысуға арнаймын, – дейді ол.

Оңтүстік Кореядағы оқу ордасы білім деңгейі бойынша әлемдегі ең үздік 200 университеттің қа­та­ры­н­а кіреді. Енді бұл оқу орнында Ризабек Алпамыспен бірге ха­лықаралық додалардың үздігі атанған атыраулық үш өрен бірге білім алады. Олар – Нұрдәулет Хаженов, Әділ Сұлтанов, Әділет Зауытхан.

Атырау облысы