«Отанды сүю осындай адал еңбектен, пайдалы жұмыстан басталады. Еліміздің әрбір азаматы еңбекқор болуы керек. Баршаңызды қолдаймын, мақтан тұтамын. Өскелең ұрпақ – біздің үмітіміз, еліміздің болашағы. Біз ардагер болып мәңгі билікте отырмаймыз. Менің ең үлкен мақсатым – жастарға жол беру», деді Президент Түркістан жастарына. Бүгінде Мемлекет басшысының осы бір өсиетті сөздері біздің университет студенттері арасында жиі қайталанып айтылуда. Яғни Отанды сүю адал еңбектен басталатыны жастар жадында жатталып қалды.
Күллі түркі халықтарына ортақ, әлемге әйгілі ғұлама, философ Қожа Ахмет Ясауи өмір сүрген түркі әлемінің бірлігі мен ынтымақтастығының белгісі және университетіміз орналасқан Түркістан қаласы Түркі әлемінің рухани астаналарының бірі болып саналады. Бұл орайда Мемлекет басшысы киелі жерге кешегі сапарында қазақ жылнамасына алтын әріппен жазылған көптеген тұлғамыздың осында жерленгеніне тоқталып, былтыр қалаға Түркі әлемінің рухани астанасы деген мәртебе берілгенін айтты. Президенттің пікірінше, бұл оқиға Түркістанды тұтас түркі жұрты ерекше қадірлейді дегенді білдіреді. «Біз киелі шаһарды рухани және тарихи елордамыз десек, дұрыс пайым болатынына күмәнім жоқ. Сондықтан Үкімет таяу арада Түркістан қаласына осындай мәртебе беру мәселесіне қатысты лайықты шешім қабылдайды деп ойлаймын. Қастерлі шаһар көне заманнан бері ұлттың ұясы, қазақтың қара шаңырағы болып келеді. Түркістан осы мәртебелі міндетін қазір де абыроймен атқарып отыр. Сол себепті, мен ата жолын ұстанып, Ұлттық құрылтайдың келесі отырысын Түркістанда өткізуді ұсындым. Онда ел болашағына қатысты өзекті мәселелерді талқылаймыз», деді Қасым-Жомарт Тоқаев. Бүгінде өңір жастары Ұлттық құрылтайдың киелі қалада өткізілуін үлкен мәртебе санайды. Сондай-ақ Мемлекет басшысы айтқан реформалардың жүзеге асырылуына белсенді атсалыспақ. Бұл орайда студенттеріміз аса маңызды реформалардың бірі – Президенттің бір ғана мерзімге сайлануын қолдап отыр. Бұл өзгеріс жастар тарапынан демократия жолындағы батыл қадам ретінде бағалануда. Сондықтан да алдағы сайлау науқанына белсене қатысып, өз таңдауын жасауға ниетті.
Жанар ТЕМІРБЕКОВА,
Қ.А.Ясауи атындағы Халықаралық қазақ-түрік университетінің ректоры
ТҮРКІСТАН