Спорт • 03 Қазан, 2022

Жігіттер жарап тұр

46 рет көрсетілді

Польшаның Люблин қаласындағы MOSiR Hall спорт кешенінде өткен кәсіпқой бокс кешінде үш бірдей отандасымыз, ADAL Promotions компаниясының былғары қолғап шеберлері – Бекзат Нұрдәулетов, Мейірім Нұрсұлтанов және Бекман Сойлыбаев өнер көрсетіп, қазақстандық жанкүйерлерді жарқын жеңісімен қуантты.

Польшадағы бокс кешінде бірінші болып шаршы алаңға жартылай ауыр салмақтағы отан­дасымыз Бекзат Нұрдәулетов шықты. Әуесқой бокста бірталай жетістікке жетіп, әлем чемпионы атанған маңғыстаулық боксшы 2020 жылдан бері кәсіпқой бокс­та өнер көрсетіп келеді. Бүгінге дейін бес жекпе-жек өткізіп, барлығында жеңіске жеткен ол бұл жолы да грузиялық Яго Кизириядан (6-8, 4 КО) ұпай саны бойынша басым түсті. 8 раундқа жоспарланған жекпе-жекте Бекзат айқын басымдыққа ие болып, төрешілердің бірауызды шешімімен жеңіске жетті – 79-73, 80-72, 80-72 .

Ал жартылай жеңіл салмақта жұдырықтасқан Бекман Сой­лыбаев (14-1, 5 КО) тек қазақ­стандық жанкүйерлердің емес, бокс кешін MOSiR Hall спорт аренасынан тамашалаған жер­гілікті көрермендердің де ыс­тық ықыласына бөленді. Аздаған үзілістен кейін карьера­сын қайта жалғастырған жерлесіміз Польшада Оңтүстік Африка Республикасының өкілі Сифосетху Мвулмен (16-4-1, 7 КО) WBA Inter-Continental белбеуі үшін жұдырықтасып, қарсыласын жетінші раундта сұлатып салды. Бекманның жойқын соққысын өткізіп алған Сифосетху біраз уақыт есін жия алмай, жекпе-жекті жалғастырудан бас тартты. 

Қазақстандық боксшылар­дан соңғы болып шаршы алаңға орта салмақтағы Мейірім Нұр­сұл­танов шықты. Бұл жекпе-жек­те отандасымыз биыл ғана жеңіп алған WBO International бел­беуін бірінші рет сәтті қорға­ды. Аргентиналық Марсело Фа­биано Касереспен (18-4, 13 КО) жұды­рықтасқан жерлесіміз 10 раунд­тың қорытындысы бойынша ұпай санымен жеңіске жет­ті. Бір төреші отандасымызды 98-92 есебімен алда болды деп есеп­тесе, екі төрешінің пікірі бойын­ша Нұрсұлтанов бір раунд ба­сым­дығымен ұтқан – 96-94. Бұл – 29 жастағы Мейірім Нұрсұлтановтың кәсіпқой бокстағы 18-ші жекпе-жегі және 18-ші жеңісі. Сондай-ақ ол 10 қарсыласын мерзімінен бұ­рын тізе бүктірген.

Бокс кешінің басты жекпе-же­гінде ауыр салмақтағы жергілікті боксшылар Михал Чеслак (23-2, 17 КО) пен Кшиштоф Твардовски (9-4, 6 КО) жұдырықтасып, ал­ғаш­қы бесінші раундта тех­ника­лық нокаутпен жеңіске жетті.

Соңғы жаңалықтар

Ұқсас жаңалықтар