Биылғы дүбірлі додаға әлемнің қырық мемлекетінен 170-тен аса қатысушы ниет білдіріп, олардан 300-ге жуық шығарма түскен. Конкурстың көркемдік жетекшісі, қазылар алқасының төрағасы Рахат-Би Әбдісағин өз сөзінде бұл байқау еліміз үшін үлкен абырой екендігін айтады. «Өйткені осы байқау арқылы Қазақстанды әлемнің көптеген елі жақын тани түсті. Себебі өнер сайысына Германия, Франция, Италия, Ұлыбритания, АҚШ, Қытай, Жапония, Оңтүстік Корея және ТМД мемлекеттерінен қатысушылар бар», деді ол.
Байқаудың мақсаты – заманауи академиялық музыканы насихаттап, жас таланттарды қолдап, оларды ынталандыру. Бұған 35 жасқа дейінгі жас композиторлар симфониялық, камералық және вокалдық шығармаларымен қатысып, бақ сынайды. Олардың туындыларын Тристан Мюрай (Франция), Марк Андре (Германия), Алессандро Сольбиати (Италия), Клод Леду (Бельгия), Юрий Каспаров (Ресей) секілді шетелдік танымал композиторлар сарапқа салады. Байқау онлайн форматта өтеді, басты ерекшелігі – барлық қатысушының есімі әзірге белгісіз, яғни құпия сөз арқылы қатысады. Жеңімпаздар 7 қазанда анықталады.
