Саясат • 06 Қазан, 2022

Әлихан Смайылов ХВҚ миссиясымен Қазақстандағы реформаларды талқылады

125 рет
көрсетілді
1 мин
оқу үшін

Премьер-Министр Әлихан Смайылов Халықаралық валюта қорының Қазақстан бойынша миссиясының басшысы Николя Бланшемен кездесті, деп хабарлайды Egemen.kz.

Әлихан Смайылов ХВҚ миссиясымен Қазақстандағы реформаларды талқылады

Тараптар еліміздегі миссия жұмысының қорытындыларын, сондай-ақ ҚР Үкіметінің инфляцияға қарсы күрес, салықтық әкімшілендіру мен бюджеттік жоспарлаудың тиімділігін арттыру шараларын, жұмыспен қамтуды қамтамасыз ету, цифрландыру және мемлекеттің экономикадағы үлесін төмендету мәселелерін талқылады.

Сонымен қатар Қазақстанның 2060 жылға дейінгі көміртегі бейтараптығына қол жеткізу жөніндегі бастамалары, инвестициялар тарту жөніндегі қадамдары, ағымдағы сыртқы экономикалық сын-қатерлер және өңірлік күн тәртібіндегі басқа да өзекті мәселелер қаралды.

«Біз ХВҚ-мен серіктестіктің стратегиялық маңыздылығын және Қордың еліміздің дамуына қосып отырған үлесін жоғары бағалаймыз», деді Әлихан Смайылов.

Николя Бланше Қазақстанда жүргізіліп жатқан реформаларға және ХВҚ елдік миссиясының жұмысына жоғары бағалады.

«Біздің арамызда берік және сындарлы ынтымақтастық қалыптасты. Біз Үкіметтің жаңа реформаларды іске асыру жөніндегі қадамдарын құптаймыз және барлық мүдделі бағыттар бойынша консультацияларымыз бен техникалық көмегімізді ұсынуға дайынбыз», деді Николя Бланше.