Бүгін де ел жастары Қазақстандағы барлық оң өзгерістің жаршысы. Соның ішінде «Аmanat» партиясының «Жастар рухы» жастар қанаты – еліміздегі ең ірі белсенді ұйым. Біз де алдағы кезектен тыс Президент сайлауына тас-түйін дайынбыз. «Жастар рухының» съезінде Мемлекет басшысы «Білім, еңбекқорлық, патриотизм» басымдықтарын ерекше атап өтті. Бізбен мүдделес, мақсаты бір жастар өз болашағын туған елімен ғана байланыстырады. Олар әділдік пен заңға, демократиялық қағидаларға негізделген Әділетті Қазақстанды көргісі келеді. Олар Президент Қасым-Жомарт Тоқаев қолға алған реформаларды қолдайды. Себебі біз Мемлекет басшысының жастарға деген зор сенімін, қамқорлығын анық көріп отырмыз.
Қазіргі уақытта жастар мемлекетті басқару ісіне белсенді араласа бастады. Басқарушылардың «жаңа формациясын» қалыптастыру мақсатында Президенттік жастар кадрлық резерві жасақталды. Мәжіліс пен мәслихаттардағы жас депутаттардың жалпы үлесі 30 пайызға жетті. Сондай-ақ мемлекеттік білім гранттарының саны 20, студент жастардың шәкіртақысы 35 пайызға ұлғайтылды. Ғылымды, соның ішінде жас ғалымдарды қаржыландыру 3 есеге артты. Алғаш рет жастардың кәсіпкерлік бастамаларын қолдауға 2,5 пайыздық шағын несие беру міндеті қойылды. Сонымен қатар жастардың цифрлық әлеуетін арттыру үшін инновациялық бағдарламалау мектептері іске қосылып, 20 мың IT-ваучер бөлінді.
Әрине, жастарға қатысты шешілмеген мәселелер аз емес. Дегенмен мемлекеттік жастар саясатындағы оң өзгерістер бізге сенім мен жігер береді. Әл-Фараби бабамыздың «Еліңнің болашағын білгің келсе, маған жастарыңды көрсет» деген қанатты сөзі бар. ХХІ ғасырдағы қазақ жастары интеллектуал, білімді, еңбекқор, өткір де намысты ұрпақ деп сеніммен айта аламын! Қиын-қыстау сәттерде, Арыс пен Мақтааралдағы су тасқыны, Қостанайдағы алапат өрт, жаһандық пандемия кезінде де алдыңғы қатарда жастар, еріктілер жүргенін білесіздер.
Біз – жастар әрқашан Отанымыздың бір қажетіне жарауға, қолымыздан келгенше жақсылық, қайырымдылық жасауға құлшынып тұрамыз! Біз алдағы кезектен тыс президент сайлауында Қасым-Жомарт Кемелұлын қолдаймыз. Өз замандастарымызды да бізбен бірге болуға шақырамыз. Бұл таңдау болашақтың таңдауы екеніне біз кәміл сенеміз!
Нұржан ЖЕТПІСБАЕВ,
«Жастар рухы» жастар қанатының төрағасы