Байқауға қатысушылар Жұмекен Нәжімеденовтің поэзиялық және прозалық шығармаларынан үзінді оқыды. Мәтінді жатқа оқуға 5 минут уақыт берілді. Дайын фонограмманы пайдалануға тыйым салынды.
– Қазақ поэзиясында өзіндік өрнегін қалдырған ақын осы өңірдегі Қошалақ топырағында дүниеге келген. Жастық шағын Алатаудың баурайында өткізгенімен, туған жерге сағынышын жырына арқау етті. Оның өлеңдерінен тағылым мен тәрбиенің, адалдық пен отансүйгіштіктің терең мәнін аңғаруға болады. Сол себептен оның шығармаларын терең зерттеп, кейінгі ұрпаққа насихаттау – біздің борышымыз, – дейді облыс әкімінің орынбасары Жасұлан Бисембиев.
Қазақстан Жазушылар одағы басқарма төрағасының орынбасары Мереке Құлкенов жетекшілік еткен қазылар алқасы қатысушылардың оқу шеберлігі, дауыс мәнері, тіл тазалығы, көркем мәтінді таңдау және сахнада өзін-өзі ұстауы талғамын саралады. Байқау қорытындысымен бас жүлдеге алматылық Аршын Нұрбақыт лайық деп танылды. Жетісу облысының өкілі Аршын Айдынбекұлы бірінші орынды иеленді. Ал түркістандық Ержан Жолдасов екінші, Батыс Қазақстан облысынан қатысқан Бекзат Васихан үшінші жүлдеге ие болды.
Атырау облысы
