Қазақстан халқы саяси өзгерістердің маңызын түсініп, Президенттің бастамаларын қолдайды. Соның бірден-бір дәлелі – 2022 жылғы маусымда өткен жалпыхалықтық референдумға ел азаматтарының көпшілігінің қатысуы. Мемлекет басшысы кезектен тыс президент сайлауын биыл өткізу жөнінде шешім қабылдады. Алдағы сайлауды Қазақстан тарихындағы жаңа сапалы кезеңнің бастауы ретінде қабылдаймын. Бұл – әділетті қоғам құру жолындағы маңызды қадам.
Жуырда Мемлекет басшысы Қасым-Жомарт Тоқаевтың Павлодар өңіріне жасаған сапарынан, оның жергілікті жұртшылықпен жүздесуінен ұққаным – Президент өңірдегі жағдайдың бәрінен хабардар екен. Мемлекет басшысының облыс түгілі, әрбір аудан мен қаладағы жағдайды назарда ұстайтыны қуантты.
Екібастұз жылыту маусымын жыл сайын қиындықпен өткізеді. Шаһарды жылытып отырған жалғыз жылу-электр орталығының жағдайы тым нашар. Жергілікті билік қолдан келгенін жасап жатыр. Қасым-Жомарт Тоқаев өңір халқымен болған кездесуде жылу-электр орталығының мәселесін айтқанда, ел тілегінің Президентке жеткенін ұқтық. Демек ендігі жерде екібастұздықтарды жылдар бойы алаңдатып келген мәселенің оң шешім табарына сенеміз. Қыстың көзі қырауда. Алда не боларын білмейміз, бойда қорқыныш бар. Президенттің бүгінгі сөзі үрей құшағында отырған екібастұздықтарға зор үміт сыйлады.
Жалпы, Президент Павлодар өңіріндегі түйінді мәселелерді де, аймақтың дамуын қамтамасыз ететін басым бағыттарды да атап, айқындап берді. Соның ішінде жастарға мүмкіндік берілетінін баса айтты. Жастарға сенім арта отырып, жауапкершілікті сезіндіру маңызды. Президенттің қай салада болмасын жастарға жағдай жасап, мүмкіндік беру керек деген пікірін толық қолдаймын.
Жас ұрпақ аға буынның өмір жолынан тағылым ала білуі керек. Шетелде жүрген жастарымыздың кез келген сәтте елге оралуына мүмкіндік бар. Тіпті шетелде жүрсе де сол жақтан ел мүддесіне қызмет жасай алады. Президент атап өткендей, бастысы біз оларға мемлекетшілдік рухын сіңіріп, ел игілігіне қызмет етуге жұмылдыра білуіміз керек. Қазіргі жастардың өршіл идеялары мен ерік-жігері Қазақстанды дамытатын басты күш екені де анық. Бастысы, олардың осы әлеуетін дұрыс арнаға бағыттау керек.
Қасым-Жомарт Тоқаевтың қатысуымен өткен жиыннан көп ой түйдік. Президент облыс басшылығына ауқымды міндеттер жүктеді. Солардың бәрі ойдағыдай жүзеге асса екен деген тілегіміз бар.
Серік ЗАҢОВ,
Екібастұз ГРЭС-2 стансасының ауысым басшысы,
Екібастұз қалалық қоғамдық кеңесінің мүшесі
Павлодар облысы