Суреттерді түсірген Дмитрий ЕРОФЕЕВ
Қаратал ауданы әкімдігінің мәліметіне сүйенсек, ауданда 24 800 гектар суармалы егістік болса, соның 8 мың гектары – дәнді дақыл. Былтыр күріш 800 гектарға егілсе, биыл 950 гектардан өнім жиналды. Жер ыңғайы мен климаттық ерекшелігіне қарай дәнді дақылдың осы түрімен мұнда 3 ірі шаруашылық және онға жуық шағын шаруа қожалығы айналысады.
Қараталдағы күріш өсірумен айналысатын ірі фермерлердің бірі – «Үштөбе» ЖШС. Оның директоры – Арман Ахметбаев. Жиырма жылдан астам уақыттан бері егіншілікті кәсіп еткен шаруашылықтың 1 351 гектар жері бар. Онда майбұршақ, дәнді дақылдар мен мал азығы егіледі. Биыл күрішті 260 гектарға сеуіп, одан 1 100 тоннадан астам дән жинады. Өнімнің орташа шығымы гектарына 40 центнерді құрап отыр.
«Бұрнағы жылдарға қарағанда, биыл су жеткілікті, ауа райы да қолайлы болды. Соған қарай өнім жақсы шықты. Қазір жиын-терін науқаны аяқталып қалды. Дақылды сабағынан кесеміз, бір аптадай алқапта күн астында жатып қураған соң күріш дәні жиналады. Сосын қоймаға апарып бастырамыз. Серіктестіктің цехында қаптап, нарыққа жөнелтеміз. Өніміміз негізінен жергілікті тұрғындарға саудаланады, Жетісу мен Алматы облысының сауда орындарына жіберіледі», дейді серіктестік директоры А.Ахметбаев.
Оның айтуынша, күріш алқабында ауыспалы егіс талабы қатаң сақталады. Осы мақсатта күріш былтырға қарағанда биыл азайтылып, 260 гектарға егілсе, келесі жылы оның көлемі қайтадан 500 гектарға жеткізіледі.
Аудандағы күріш бағытындағы сервистік дайындау орталығы осы шаруашылық базасында, яғни онда жаңа 11 ауыл шаруашылығы техникасы шоғырланған. Ал жалпы, серіктестіктің өзінде 6 комбайн, 23 трактор бар. Шаруашылықта 18 адам жұмыс істейді.
«Бізде күріштің қызылордалық «Янтарь» және ирандық «Кусар» сұрыптары егіледі. Бұл екі сортқа белгілі себеппен тоқталдық. Ауданымыз салыстырмалы алғанда солтүстік аймақта орналасқандықтан және Қаратал өзенінің басында отырғандықтан, алқап суаратын су жылып үлгермейді. Біздің осындай ерекшелігі бар климатымызға осы екі сорт қолайлы. Өнім сапасын төмендетіп алмау үшін екі жылда бір рет тұқымды жаңартып отырамыз. Өзім зейнетке шыққанмын, бірақ шаруашылыққа көмектесіп, тәжірибемді жастарға үйретіп келемін», дейді серіктестіктің агрономы Вилорий Цой.
Жетісу облысы әкімінің баспасөз қызметінің мәліметінше, мемлекеттен тұқымға, тыңайтқыштарға, гербицидке берілетін субсидия шаруаларға едәуір көмек болған. Оған қоса ауданға көктемгі және күзгі жиын-терінге 800 тонна арзандатылған дизель отыны бөлінсе, соның 80 тоннасын осы «Үштөбе» ЖШС кәдесіне жаратқан. Осы ретте биыл облыста ауыл шаруашылығын қолдауға 27,9 млрд теңге бюджет қаражаты бөлінгенін, оның 23,2 млрд теңгесі субсидияға жұмсалғанын атап өтуге болады.
Айта кетейік, Қаратал ауданында 1 183 ауыл шаруашылығы тауар өндірушісі бар, соның 400-і егінмен, 450-і мал өсірумен айналысады. Оған қоса 333 аралас шаруашылық пен 12 жауапкершілігі шектеулі серіктестік тіркелген.
Жетісу облысы,
Қаратал ауданы
