Қаланың құрметті азаматы, еңбек ардагері Александр Чжен қалаға Қонаевтың есімін бергені үшін Президентке алғыс айтты.
«Огни Алатау» газетінің бұрынғы журналисі, жазушы Владимир Таран Мемлекет басшысына Қапшағай қаласы туралы өзі жазған «Солнечный город. Страницы истории» кітабын сыйға тартты.
Кездесу барысында ұлттық спортты дәріптеуші Тимур Сыпатаев «Қазақ елінің бірлігі, ынтымағы осы шегедей мықты болсын» деген тілекпен темірден түйін түйіп, Қасым-Жомарт Тоқаевка тарту етті.
Президент Алматы облысының орталығын Қонаев қаласына көшіру туралы шешімі өңірді өркендету үшін маңызды қадам болғанын атап өтіп, енді қала одан әрі қарқынды дамитынына сенім білдірді.
