Коллажды жасаған Амангелді Қияс, «ЕQ»
Мемлекет басшысы халыққа екі рет Жолдау арнап, саяси және экономикалық саясатымызды түбегейлі өзгерту арқылы әділетті Қазақстан құру жолына түсетінімізді айтты. Жолдауда «Ұлттық табыстың игілігін жұрттың барлығы көріп отырған жоқ, әрине, мұның барлығы күрделі мәселелер, оны шешудің нақты жолдары бар» дей келіп, халық тұрмысын жақсартудың бағыт-бағдарын айқындады. Әлеуметтік әділдікті орнатып, Ұлттық қордың инвестициялық табысының 50 пайызын балалардың арнаулы есеп шотына, 7 пайызын «Қазақстан халқына» қорына аударуды ұйғарды. Келесі жылы 100 мың жасты жұмыспен қамту, жас кәсіпкерлер мен студенттерге 2,5 пайыздық несиелер беру және білім-ғылым, денсаулық сақтау және тағы басқа да салаларға реформа жасау жөнінде тапсырмалар берді.
«Сөз түзелді, тыңдаушы, сен де түзел» деп Абай атамыз айтқандай, Мемлекет басшысы Әділетті Қазақстан құрудың бағытын айқындады. Өз мүмкіндігін толықтай көрсете алмай келген ауыл шаруашылығы мен тұралап тұрған ауылдардың тамырына қан жүгірту мәселесі қайта қозғалды.
Көп әкімнің жұмысына халықтың көңілі толмағаны шындық, оған біздің де жауапкершілігіміз бар екенін ұмытпағанымыз жөн. Әкімдердің жұмысын қадағалап, оларға бағыт-бағдар береді деген кейбір ақсақалымыздың кадр өсірумен айналысып, тендер алушылардың сойылын соғып кеткені белгілі. Қаралы қаңтарда әлеуметтік әділетсіздікке наразы болған жастар кімге сенерін білмей сеңдей соғылысқанда кейбір облыстар мен қалаларда жастарға басу айтып, арандап қалмауға шақыратын ақсақалдар мен зиялы қауымның болмағаны елдігімізге сын.
Өсіп келе жатқан жас ұрпақ сөзімізге емес ісімізге қарайтыны белгілі. «Ұяда не көрсең ұшқанда соны ілерсің», деген тәмсіл бекерге айтылмаған. Сондықтан аға буын жастарға ісі, еңбегі, адалдығымен үлгі болғаны жөн.
Мемлекет басшысы Қ.Тоқаев алдағы уақытта барлық деңгейдегі әкімдерді кезең-кезеңімен халықтың таңдауы арқылы сайлануға жол ашатынын ескертті, қазірдің өзінде ауыл әкімдері жергілікті халықтың сайлауы арқылы билікке келіп жатыр. Осы мүмкіндікті пайдалана отырып нағыз іскер, отаншыл азаматтар кеңесе отырып, жұмыла жұмыс істеуі керек. Атам қазақ «Кеңесіп пішкен тон келте болмас» дегенді осындай берекелі елге қаратып айтқан. Ардагерлер, басқа да қоғамдық ұйымдар барлық саланың жұмысының нәтижелі болуын талап ететін институтқа айналуы қажет.
Ол үшін бізге ауызбіршілік ауадай қажет. Қазір әлемдік геосаяси жағдай күннен-күнге ушығып барады. Құдай қосқан көршілеріміз өз жақындарымен жауласып, аяғы қантөгіске ұласып отыр. Ресей мен Украина, Қырғызстан мен Тәжікстан, Қытай мен Тайван ежелден ағайынды елдер болғанымен араларына сызат түсіп, бір-бірін аңдысып отыр. Бұл текетірестің салқыны осы мемлекеттердің ортасында отырған еліміздің экономикасы мен тұрақтылығына әсер етпей қоймасы анық. Жаппай қымбатшылықтың салқыны ел азаматтарын қинап отырғаны тағы бар. Осындай ұрымтал тұсты пайдаланып, айрандай ұйыған тыныштығымызды бұзғысы келетін сыртқы күштермен бірге арамызда жүрген жат ниеттілердің де бар екенін бағамдап білгеніміз жөн. Берекемізді бұзғысы келетіндердің бары анық, олардың мақсаты – мемлекеттілігіміздің тамырына балта шабу.
Мемлекет басшысы Жолдауында айтқан кезектен тыс президент сайлауы 20 қарашада өтетіні белгілі болды. Осыған орай әрбір республикалық қоғамдық бірлестік өз кандидаттарын додаға қосты.
Еліміздегі ең ықпалды саяси күшке айналған «Amanat» партиясының XXIV съезінде ел президенттігіне үміткер ретінде Қ.Тоқаевтың кандидатурасын ұсынып, наурыз айынан бері талқыға шығарылып, халықтың қажетіне бейімделіп қайта жазылған партияның жаңа саяси тұғырнамасы бекітілді.
«Ақ жол» мен Халық партиясы және бірнеше республикалық қоғамдық бірлестік «Amanat» партиясының таңдауына қосылып, халықтық коалиция атынан ел президенттігіне үміткер ретінде Қасым-Жомарт Тоқаевты қолдайтынын жеткізді.
Халықтық коалиция форумында сөз алған әрбір азамат, Мемлекет басшысы Қ.Тоқаевтың жүргізіп отырған реформаларының халық тұрмысын жақсартуға, жастарды қажетті білім-ғылыммен қамтамасыз етуге, сапалы медициналық көмектердің қолжетімділігіне, жемқорлықты түбегейлі жойып ашық үкімет орнатуға, сондай-ақ «күшті Президент – ықпалды Парламент – есеп беретін Үкімет» қағидатын орнатуға бағытталғанын баса айтты. Сонымен бірге «Өзі бастаған реформаларын аяғына дейін жеткізуге мүмкіндік беруіміз керек» деген шешімге келді.
Әлемді тұрақсыздық жайлаған тұста Қазақстандағы бірліктің бұрынғыдан да нығая түсуі «Түрлі көзқарас – біртұтас ұлт» қағидатының көрінісіне айналып, саяси мәдениеті қалыптасқан ел екенімізді дәлелдеді. Халықтың әл-ауқатын арттыру мен мемлекеттілігімізді одан әрі нығайтудың кепілі болатын Әділетті Қазақстан құру үшін бізге отаншылдық идеясын ұстанған, еңбекқорлық пен ауызбіршілік ауадай қажет.
Әбдіғани БӘЗІЛХАНҰЛЫ,
«Amanat» партиясы Астана қалалық филиалы саяси жұмыс бөлімінің консультанты
