Қазіргі таңда тараптар стратегиялық әріптестік туралы декларация мен Қазақстан – Мажарстан Стратегиялық кеңесі шеңберінде өзара іс-қимылды жалғастырып келеді. Тараптар елдеріміз арасындағы екіжақты саяси диалогтің маңызды бағыты болып саналатын парламентаралық қатынастарды нығайту және жандандыру мәселелеріне ерекше назар аударды.
Сонымен қатар мәдени-гуманитарлық өзара іс-қимыл туралы әңгіме барысында түркі ұйымдары аясындағы ынтымақтастық мәселесі де сөз болды. Ерлан Қошанов халықтарымызды тығыз тарихи байланыстар, ұлттық мәдениет пен дәстүрді жаңғырту мен сақтауға деген ұмтылыс біріктіретінін атап өтті. Сондай-ақ Палата Спикері Лоранд Этвёш атындағы университетте венгр тілін үйренуге ниетті қазақстандық студенттер мен қазақ тілі курстарына қатысатын венгр жастарының саны артып келе жатқанын айтты.
– Қазақтың бас ақыны және ағартушысы Абай Құнанбайұлының шығармашылық мұрасы Мажарстанда танымал болып келе жатқанына қуаныштымын. Сіздің ұлттық мәдениетті, рухани дамуды, білім беруді қорғау және дамыту туралы идеяларыңыз, сондай-ақ «Лакителек» халық институты Абайдың ағартушылық қызметімен жақын екенін атап өткім келеді, – деді Мәжіліс төрағасы.
Әңгіме барысында Ерлан Қошанов мажар спортшыларын 2024 жылы Қазақстанда өткізуі жоспарланып отырған 5-ші Дүниежүзілік көшпенділер ойындарына қатысуға шақырды.
Мажарстан Мемлекеттік Жиналысы төрағасының орынбасары Мажарстан Парламенті тарапынан Қазақстанмен барлық салада ынтымақтастықты дамыту үшін қажетті қолдау көрсетуге дайын екендігін айтты.
– Біз үшін Қазақстан мен бауырлас елдер басты орында тұрады. Туыстық және бауырластық қарым-қатынас өте маңызды капитал болып саналады, – деді Шандор Лежак.
Мажарстан Парламентінің Вице-спикері Лакителек қаласында мажар Үкіметінің гранты бойынша білім алып жатқан 300 қазақстандық студент туралы жылы лебізін білдірді.
