Кеншілер қаласында «Нұрлы жер» тұрғын үй-коммуналдық даму бағдарламасы және 2025 жылға дейінгі қаланың кешенді даму жоспары аясында баспана құрылысы қарқынды жүріп жатыр. Соның бір айғағы – ұлттық мерекеге орай игілікке берілген тұрғын үй. Биыл 21-шағын ауданда 180 пәтерлі екі тұрғын үй тапсырылып, 144 пәтерлі екі үйдің құрылысы жалғасуда. 108 отбасыға бұйырған жаңа пәтерлердің кілтін облыс әкімі Әбілқайыр Сқақов өзі табыс етті. Қуанышқа кенелгендер қатарында көпбалалы аналар, жетімдер, әлеуметтік жағынан аз қамтылғандар бар.
«Екібастұздың кешенді даму бағдарламасы, оның ішінде тұрғын үй құрылысы жалғасын табады. Кейінгі үш жылда Екібастұзда 16 көпқабатты үй салынды, тіпті бүтін бір шағын аудан бой көтерді», деп атап өтті аймақ басшысы.
Баспаналы болғандардың бірі – көпбалалы ана Айдана Мұхамедиянова. Төрт баланы жалғыз асырап отырған оған облыс әкімі тұрмыстық техника сатып алуға сертификат табыс етті. «Тарихи мерекеде бұл біз үшін айтулы күн болды. Президент пен облыс басшылығының қолдауымен жүздеген отбасы баспаналы болды. Қуанышымызды сөзбен айтып жеткізу мүмкін емес», дейді көпбалалы ана.
Айтпақшы, Екібастұзда Республика күніне орай жылдар бойы істемеген балабақша да іске қосылды. 15 жыл бойы қаңырап бос тұрған ғимарат 2 мен 5 жас аралығындағы балаларға лайықталған. Ғимарат іші толығымен жаңартылып, заманауи құрал-жабдықтармен, жиһазбен қамтылған. Жаңарту жұмыстарына жалпы сомасы 719,5 млн теңге жұмсалыпты. Екі қабатты ғимаратта 12 жатын бөлме, медициналық және азық-түлік блоктары, кір жуу бөлмесі, музыкалық зал, психолог және логопед кабинеттері, жылытылатын бассейн бар.
Қалалық білім беру бөлімінің мәліметіне сүйенсек, бүгінде шаһарда 1 мен 3 жас аралығындағы 2 мың бала балабақша кезегінде тұр. 3 пен 6 жас аралығындағы балалар толықтай мектепалды біліммен қамтылған.
Павлодар облысы,
Екібастұз қаласы
