«2026 жылға дейін білім беруді дамыту тұжырымдамасы әзірленді. Тұжырымдама стратегиялық және бағдарламалық құжаттарда анықталған негізгі басымдықтарды қарастырады. Біз әртүрлі халықаралық зерттеулер мен талдаулардың нәтижелерін ескере отырып, сарапшылармен және педагогикалық қоғаммен талқылаулар өткіздік, тиісті ұсыныстар әзірледік. Құзыретіне сәйкес алты бағыт, 109 іс-шара қарастырылған», деді Асхат Аймағамбетов.
Ол министрлік білім беру тұжырымдамасы шеңберінде көзделген міндеттер мен бастамаларды іске асыру үшін сапалы шаралар қабылдайтынын атап өтті.
Сондай-ақ ведомство басшысы балалардың ерте дамуына байланысты мәселеге пікір білдірді.
«Білім берудің маңызды деңгейі - балабақшалар. Зерттеулерге сәйкес, балабақшалар балалардың интеллектуалды, эмоционалды, әлеуметтік, психологиялық дамуына әсер етеді. Осыған байланысты балабақшаларда балаларды дамытудың жаңа моделі енгізілуде, оқыту бағдарламалары мен әдістері өзгеруде. Бұл мектепке дейінгі тәрбие мен оқыту саласындағы ең үлкен өзгеріс деп айтуға болады. Егер бұрын бағдарлама тым академиялық болса және 3-4 жастағы балалар 20 минуттан сабақ алса, енді халықаралық тәжірибені ескере отырып, оқу процесі ойын арқылы өтеді», деп түсіндірді ведомство басшысы.
Министрдің айтуынша, баланың тұтас дамуы үшін барлық жағдай қарастырылатын болады.
