Облыстық перинаталдық орталықта 6 қыркүйекте Аянгүл Сәбитова үш ұлды өмірге әкелді. Сәбилердің екеуінің салмағы 1800, ал үшіншісінің салмағы 2200 гр болған. Әкесі мен шешесі жаңа туған сәбилерге Ахмад, Батырхан, Исмаил есімін берген.
– Бұрын менің де, әйелім Аянгүлдің де отбасында үшем өмірге келмеген. Біз үшем дүниеге келетінін алғаш естігенде, әрине, қуанышымызда шек болмады. Бұл – құдіреті күшті Алланың бізге берген үлкен сыйы, – дейді үш ұлдың әкесі Есет Құмар.
Енді міне, 8 қарашада Атырау қалалық перзентханасында тағы бір үшем өмірге келді. Енді Мұрат Сұлтановтың отбасы екі қыз, бір ұлмен толығып отыр. Екі қыздың салмағы – 1750, 1630, ұлдың салмағы – 1960 гр.
– Біздің әулетте үшем де, егіз де болған. Менің атам Берішқали жүргізуші, әжем Нұрсұлу зауытта аспаз болып жұмыс істеген. Әкем – отбасындағы үлкен бала. Әжем Нұрсұлу төрт баладан соң 54 жыл бұрын үшемді – екі ұл, бір қызды босанған екен. Үшемнің сыңары болған ағайымның бірінің қызында егіз бар. Енді міне, дәл сондай қуанышқа біз де кенеліп отырмыз. Әйелім Альбина екеуміз 2020 жылы отбасын құрған едік, – дейді үшемнің әкесі Мұрат Сұлтанов.
Оның да, әйелінің де мамандығы – педагог. Өзі 2020 жылы Х.Досмұхамедов атындағы Атырау университетін алғашқы әскери дайындық пәнінің мұғалімі мамандығымен бітірген. Алматы қаласындағы жоғары оқу орнын бітірген әйелі – денешынықтыру пәнінің мұғалімі. Қазір Мұрат Сұлтанов Атырау қаласындағы №38 мектеп-лицейде, әйелі Альбина №33 орта мектепте таңдаған мамандығымен жұмыс істейді.
Атырау облысы
