Қысы ұзақ өңірде отынды ертерек қамдап алған абзал. Арқаның апталап соғатын ақ бораны мен үскірік аязы арқаны кеңге салуға мүмкіндік бере қоймайтынын ел жақсы біледі. Облысқа қысқы маусымға қажетті көмір көлемі 1 млн 321 мың тоннаны құрайды. Кей жылдары қазандыққа қажетті көмір мен мазут уақтылы жеткізілмей, елдің арқасын аяз қарығандай алаңдайтын уақыты да болған. Қатал қыс жайбасарлықты кешірмейді. Соңғы жылдары бұл тарапта ауқымды қиындық бола қойған жоқ. Биыл да ертерек қамданғандықтан, қажетті қор уақтылы жинақталуда. Облыстың коммуналдық саласына 490 мың тонна көмір қажет болса, бүгінге дейін оның 57 пайызы жеткізілді. Бюджеттік салалар да тыңғылықты дайындалды. Өңірдің білім беру, денсаулық сақтау, әлеуметтік және коммуналдық салаларына энергия ресурстарын қажетінше жеткізу үшін алдын ала келісімшарттар жасалған. Бұл жұмыс алдын ала түзілген кесте бойынша жүргізіліп келеді. Қазір қазандықтарда екі айға еркін жететін отын қоры бар. Жоғарыда айтқан салаларға жылыту маусымына жоспар бойынша 118,4 мың тонна қажет болатын болса, 117,1 мың тонна көмір жеткізілген.
Облыс орталығын жылумен қамтамасыз ететін «Көкшетау жылу» мекемесінің 20 күндік қажеттілігі 40 мың тонна болса, қазір мұнда 50 мың тонна қор бар. Степногор жылу электр орталығына 20 күнге 52 мың тонна көмір қажет болса, дәл қазір 157 мың тонна көмір жеткізілген. Мазут қоры да жеткілікті.
Ендігі бір мәселе, өңірдегі жеке тұрғын үйлерді қажетті көмірмен қамтамасыз ету. Бұл тарапта былтыр біршама қиындық орын алған болатын. Көпшілік жақсы жанатын, күлі аз қалатын Шұбаркөл көмірін алғысы келеді. Көмірдің бұл түрі уақытында жеткізілмей, көмір қоймаларында кептеліс пайда болып, кейістік туындаған. Биыл мұндай келеңсіз көрініс орын алған жоқ. Жекеменшік үй иелеріне шамамен 831 мың тонна көмір қажет. Күздің алғашқы айларында-ақ халыққа қажетті көмір уақтылы жеткізіле бастады да, өңір тұрғындары өз қажеттіліктерін алып, қыстан қысылмайтындай жағдай туындады. Қазір жүз мыңнан астам тұрғын үйді қамтамасыз етуге қажетті көмірдің 65 пайызы жеткізілді.
Биыл тұрғындар тарапынан өкпе-наздың туындамауына әсер еткен тағы бір жай бар. Облыс әкімдігі Индустрия және инфрақұрылымдық даму министрлігімен, «Қазақстан темір жолы» акционерлік қоғамымен, көмір өндіретін кәсіпорындармен бірлесе отырып, өңір тұрғындарына қажетті көмірді уақтылы тасымалдауға қол жеткізді. Көмір тасумен айналысатын 62 оператор облыс қалалары мен 16 ауданды қамтамасыз етті. Үш айдың ішінде салмағы 485 мың тонна болатын 6 992 вагон көмір жеткізілді. Оның ішінде тұрғындар тарапынан сұранысқа ие болып отырған Шұбаркөл көмірінің 160 мың тоннасы бар. Қазір көмір сататын базаларда 55 мың тонна көмір бар. Облыс орталығында 3 мың тоннадан астам көмір жинақталған. Қажет еткен адамдар өздеріне қолайлы уақытта сатып ала алады.
Бір жақсысы, биыл көмір бағасы айтарлықтай қымбаттаған жоқ. Қазан айында темір жолмен тасымалдау тарифінің өзгеруіне байланысты 4 пайыздық үстеме қосылып, Шұбаркөл көмірінің әр тоннасы 16 100 теңге болды. Қаражыра, Майкөбе көмірлерінің құны да былтырғы деңгеймен шамалас.
Қытымыр қыста қысылмау үшін тиісті орындар өз ісін тындырымды атқарып, бар шаруаны уақтылы үйлестіруде.
Ақмола облысы
