Қазақстанның халық жазушысы, Мемлекеттік сыйлықтың лауреаты Әзілхан Нұршайықовтың 100 жылдығына орай Павлодарда «Өмір жолы» атты дөңгелек үстел мәслихаты ұйымдастырылды. Жазушы 1953-1956 жылдары облыстық «Қызыл ту» газетін басқарып, кейін «Социалистік Қазақстанның» облыстағы меншікті тілшісі қызметін атқарды.
Дөңгелек үстелге мұрындық болған Бұқар жырау атындағы әдебиет және өнер музейінің басшысы Ербол Қайыров атап өткендей, қабырғалы қаламгердің 100 жылдық мерейтойы – елге ортақ торқалы той. Биыл музей қызметкерлері Алматыға арнайы барып, Әзағаның қызы Жанар Нұршайықованың үйінде болып, жазушы көзі тірісінде тұтынған жеке заттарын, сирек кітаптарын аттай қалап алып келген. Бұған қоса архивтерден Павлодар жерінде жүріп айтулы тұлғалармен түскен фотосуреттері, қолжазбалары да алыныпты. Осының барлығы қазіргі күні көпшілікке таныстырылып, музейге ағылған жұрттың назарына таныстырылуда.
Торайғыров университетіндегі журналистика кафедрасының профессоры Серік Елікбай соғыстың сұр шинелін киіп, бейбіт өмірге оралған жас қаламгердің, қазақ солдатының бейбіт өмірге деген сүйіспеншілігін, махаббат сезімін, ой иірімдерін «Махаббат, қызық мол жылдар» кітабынан табуға болатынын жеткізді.
– Жастық шағымызда сүйіп оқыған «Махаббат, қызық мол жылдар» романы сүйіспеншілік тақырыбындағы таптаурын дүние емес, нағыз қазақ азаматына тән мөлдір сезім мен буырқанған жастық отының шынайы көрінісі еді. Оны соғыс өртінен енді оралған қазақ солдатының дүниетанымы арқылы қарапайым тілде жеткізу шебердің шеберінің ғана қолынан келетін әдеби үрдіс. Ал Бауыржан Момышұлы жайлы жазылған «Ақиқат пен аңыз» туындысы майталман шығармаларының ішіндегі ең ұшар шыңы еді. Екеу ортасындағы әңгіменің үлкен романға жүк болып, онда кешегі даңқты баһадүрлеріміздің жалғасындай Бәукеңнің ерлік істері көз алдымызда болып жатқан оқиғадай өрбітіле жазылды, – дейді С.Елікбай.
Әзілхан Нұршайықов пен жазушы-драматург Мұқан Иманжанов араларынан қыл өтпес достар болғаны белгілі. Оның үстіне М.Иманжановтың «Есеновтің тағдыры» атты әңгімесі кейін Әзағаңа жоғарыда аталған махаббат тақырыбындағы роман-бестеллердің жазылуына түрткі болады. Филология ғылымдарының докторы, профессор Айтмұхамбет Тұрышев қос тағдыр иесінің бір-біріне жазған хаттары жайында сыр шертті. Қаламгерлердің хат арқылы ел мен жердің, халықтың мұң-мұқтажын көтерген тұстарын әсерлі баяндады. Ал Қазақстан Жазушылар одағының мүшесі, ардагер журналист Ғалымбек Жұматов қаламгермен өткен кездесулер жайында әңгімелеп, Кереку өңірі тұлғаның жазушылық жолға бет бұруына түрткі болғаны туралы тарқата айтты. Ал Торайғыров университетінің ғылыми хатшысы Әйгерім Шахарман көптеген мәліметпен бөлісті.
«Өңірлік басылымның негізін кезінде есімі Алты алашқа мәлім Бейсенбай Кенжебаев қаласа, одан кейін газетті мүлде бөлек белеске шығарған екінші тарлан Әзағаң болатын. Сол атпал ағаларымыз салып кеткен сара жолды жалғастырған газет бүгінде Ертіс-Баян халқының шынайы ықыласына ие болып, оқырманның оң бағасын алып отыр. Жуықта республикалық «Үркер» сыйлығын жеңіп алғанымыз соның бір дәлеліндей. Газет редакциясы үшін Әзілхан Нұршайықовтың жасап кеткен еңбегі ұмытылмайды», деп атап өтті «Saryarqa samaly» газетінің бас редакторы Нұрбол Жайықбаев.
Дөңгелек үстел барысында ақынның өмірі мен шығармашылығынан көрме ұсынылды.
ПАВЛОДАР
