![Байқаушылар дайын](/media/2022/11/18/27947_1610297866.jpg)
Орал қаласында «Партиялық емес байқау орталығы» республикалық қоғамдық бірлестігінің БҚО филиалының ұйымдастыруымен маңызды саяси науқанға байқау жүргізу барысы сөз болған брифинг өтті. Филиал сайлау туралы құқықтық талаптарға сәйкес ақпарат беру, сайлаушылар мен бақылаушылардың міндеттерін құқықтық негізде түсіндіру, жергілікті сайлау комиссиясымен өзара бірлескен іс-қимылдар жасауға мүдделі. Яғни орталық бөлімшесі сайлау үдерісіне қоғамдық байқау жүргізу мақсатында құрылған болатын. Бұл – әділ әрі ашық сайлауға мүдделі Қазақстан азаматтарының тәуелсіз, ерікті бірлестігі. Оның құрамына қоғамдық ұйымдардың өкілдері, БАҚ өкілдері, жастар, сарапшылар, азаматтық белсенділер кірді.
«Партиялық емес байқау орталығы» республикалық қоғамдық бірлестігінің Батыс Қазақстан облыстық аймақтық өкілі Асхат Өкшебаевтың айтуынша, филиал 21 қыркүйектен бастап 40-тан астам іс-шара өткізген. Атап айтсақ, Орал қаласы мен 12 аудандағы байқаушыларға оқыту семинар-тренингі, бірінші рет сайлауға қатысатын жастардың құқықтық сауаттылығын арттыру бойынша семинар, өңірдің зиялы қауым өкілдері мен үкіметтік емес ұйымдарымен кездесу, байқаушыларға арналған тренингтер, аймақтық сайлау комиссиялары жұмыстарымен танысу, сайлауға түсуші кандидаттардың теңдігін байқау бойынша іс-шаралар ұйымдастырылған.
Облыстық филиал сайлау күні 505 сайлау участкесінде 901 байқаушы жұмысын ұйымдастырады. Өкілдікте облыстың 18 координаторы: Орал қаласында – 6, аудандарда – 12 және 54 мобильді капитан, заңгер, БАҚ және әлеуметтік желілерде сараптама жүргізетін еріктілер жұмылдырылмақ.