Мәселен, кейінгі 7 айда, яғни осы жылдың 1 мамырынан бастап 15 қарашаға дейін Астанаға 259,2 мың тонна көмір жеткізілген. Қазір еліміздегі теміржол тұйықтарындағы қатты отынның көлемі 317,8 мың тоннадан асады. Оның ішінде бас қаладағы теміржол тұйықтарында көмір қоры шамамен 19,2 мың тоннаға тең. Ақмола облысында – 58 мың тонна. Бұл пункттер тиісті инфрақұрылыммен, оның ішінде тиеп-түсіру техникасымен толық жабдықталған.
Астанадағы теміржол тұйықтарынан көмір Ақмола облысының таяу маңдағы елді мекендеріне (Жібек жолы, Талапкер, Қосшы және Аршалы және тағы басқалары) сатылады.
Индустриялық даму комитеті төрағасының орынбасары Тұрар Жалмағамбетовтың айтуынша, халықты қатты отынмен қамтамасыз ету жұмыстары Индустрия және инфрақұрылымдық даму министрлігінің тұрақты бақылауында. Биыл жылыту маусымына дайындық наурыз айында басталды. Осыған байланысты қазір күнделікті мониторинг жүргізіліп келеді.
– Министрлік тұрақты негізде жергілікті атқарушы органдар, «Қазақстан темір жолы» ұлттық компаниясы және көмір разрездерімен қатты отынмен қамтамасыз етуге байланысты, сондай-ақ өңірлерде дүрбелеңді болдырмау үшін күнделікті кеңес өткізіп келеді. Бағаның өсуіне жол бермеу мақсатында тамызда барлық компания бағаны бекіту туралы меморандумға қол қойды. Көмірдің орташа бағасы былтырғы деңгейде сақталып отыр, – дейді Т.Жолмағамбетов.
Оның айтуынша, Индустрия және инфрақұрылымдық даму министрлігі өңірлердің әкімдіктерімен бірлесіп, көмірді жеткізу және бөлу мәселелерін ерекше назарда ұстап отыр. Халықты қатты отынмен қамтамасыз ету үшін жауапты ведомство бірқатар шара қабылдады. Оның ішінде алдағы жылыту маусымында қатты отын тапшылығын болдырмау үшін құзырлы орган жылыту маусымы кезеңінде автокөлікпен көмірді әкетуді 6 айға шектеу туралы бұйрықты қабылдады. Аталған шешім көмір разрездері және өңірлік әкімдіктермен бірлесіп әзірленді.
– Қазір қандай да бір дүрбелең жоқ. Мүмкін бұл адамдардың көмір қорын алдын ала жинақтап алуымен байланысты шығар. Сондай-ақ қаланың көгілдір отынға көшіріліп жатқанын ескеру қажет. Қазір халықтың едәуір бөлігі көмірді сатып алған. Вагондарды жіберу мен оларды тазалауға қатысты мәселе туындап отырған жоқ, – деді көмір қоймасының меңгерушісі Алтынбек Есжанов.
Бұл ретте көмірдің қоры, бағасы және бар-жоқтығын анықтау туралы сұрақтардың жауабын 109 сенім телефон нөміріне хабарласу арқылы алуға болады. Теміржол тұйықтарындағы көмірдің бағасы, оның ішінде Астанадағы қатты отынның құны туралы айтсақ, Майкөбе көмірінің тоннасы – 13 200 теңге, Шұбаркөл көмірінің бағасы – 13 900 теңге, Қаражыра көмірінің құны – 14 600 теңге.
Сонымен қатар Halyk Market платформасына өңірлік операторларды қосу жұмыстары жалғасып жатыр. Осы орайда заманауи шешімдердің қатты отынды тікелей теміржол тұйықтарынан кезексіз сатып алуда септігі мол екенін айта кеткен абзал. Бұл өз кезегінде халықты жылыту маусымына уақтылы дайындауға мүмкіндік береді. Аталған қанатқақты жобаға Қызылорда, Жамбыл, Павлодар, Қостанай, Қарағанды, Солтүстік Қазақстан және Ақмола облыстары мен Алматы қаласы қосылды.
