Еуразиялық интеграция кәсіпкерлер үшін өте пайдалы

АСТАНА. 30 мамыр. Интеграция – бұл қазіргі қалыптасып жүрген жаңа ұран. Интеграция арқылы адамдар бір-біріне жақындай түседі. Жақындасқан адамдар жұмыла жүріп, дамудың кең даңғылына түсе алады. Египеттік кәсіпкер, «Лос Амигос» компаниясының басқарушы директоры Галяль Махер Галяль Эльгор осылай деді. Бұл туралы egemen.kz тілшісі хабарлады. Галяль Махер Галяль Эльгор: «Еуразиялық экономикалық одаққа мүше елдер бұл бірлестіктің игілігін міндетті түрде көреді, жақсы мүмкіндіктеріне қол жеткізеді. Мен мұнайшымын, сол себепті бұл саладағы зор мүмкіндіктерді білемін. Бұл бағыттағы Қазақстанның қуатын, байлығын бағамдаймын. Қазақстан әлемнің минералды байлығының айтарлықтай бөлігіне ие. Ал оның бәрін игеру, өндірісті дамыту, өнімді нарыққа шығару үшін сауда-экономикалық ықпалдастықтың пайдасы зор. Ал бүгінгі шарт осы мүмкіндіктерді ашып, барлық инвесторларға тиімді алаң тудырғалы тұр. Енді біз сіздердегі 17 млн. емес, 170 млн. халқы бар нарықты айтатын боламыз. Бұл – бизнес үшін өте ауқымды нарық. Мұнайшы ретінде, Қазақстан маған қашанда жақын, қазақстандықтар біздің ағайынымыз», – деді. Сондай-ақ, ол Еуразиялық экономикалық одақ Қазақстанның сыртқы саясатын жетілдіре түседі деген пікірін білдірді. Жолдыбай Базар. Дереккөз: egemen.kz. Фото: «24kz».