Театрдың ашылу салтанатына Астанадан Мәдениет және спорт министрі Дәурен Абаев, Қазақ ұлттық өнер университетінің ректоры, Қазақстанның Еңбек Ері Айман Мұсақожаева, генерал-лейтенант Абай Тасболатов, Дүниежүзілік Канн кино фестивалінің лауреаты Самал Есләмова, Мәжіліс депутаты Жанарбек Әшімжан арнайы келді.
Салтанатты кешті ашқан облыс әкімі Құмар Ақсақалов тұрғындарды жарқыраған сәулетімен облыс орталығын биік белеске көтерген өнер ошағының ашылуымен құттықтап, алғашқы сөзді Дәурен Абаевқа берді. Ол өзінің сөзін Президент Қ.Тоқаевтың солтүстікқазақстандықтарды осынау тамаша өнер ғимаратының ашылуымен құттықтаған хатын оқып беруден бастады. Өзінің сөзінде Қызылжар өңірі сал-серілердің киелі бесігі екенін айта келіп, Сегіз Сері, Біржан сал, Ақан сері, Мағжан, Сәбит, Ғабит, Сафуан сияқты өнер мен әдебиет саңлақтары шыққан өлкенің мәдениеті жаңа биіктерге көтерілуін тіледі. Астаналық қонақтардың бәрі де өздерінің сөзінде жаңа театрдың өлке мәдениетін көтеруге үлкен қызмет ететініне сенім білдірді.
Бес жүз көрерменге арналған театр ғимаратының құрылысы 2018 жылы басталып, бір жылда аяқталуға тиіс еді. Бірақ жобаға біршама өзгерістер енгізіліп, оның құрылысы кешеуілдеп кетті. Құрылысты жетілдіріп, сәулетін арттыруды тікелей облыс әкімі Құмар Ақсақалов талап еткені туралы «Egemen» бұрын жазған болатын. Тапсырыс беруші облыстық әкімдік болғандықтан театрдың сәулеті осы заманғы жоғары талапқа сай болуы талап етілген еді. Сондықтан жобаға көп өзгеріс осы тұрғыда енгізілген. Оның үстіне жаман індеттің өршіп тұрған кездерінде тиісті құрылыс материалдары мен театр жабдықтары уақытында жеткізілмеді. Құрылыс жұмыстары осы себептермен ұзап кеткен.
Негізгі мердігер компания ІІМ ҚАЖ комитеті Түзету мекемелеріне жататын «Еңбек-Өскемен» кәсіпорны болды. Құрылыстың жалпы құны 4,8 млрд теңге шамасында, осының ішінде құрал-жабдықтар мен басқа да шығындар бар.
Жарқыраған театрдың жалпы ауданы 15,5 мың шаршы метр. Қаламызда бұрын-соңды мұндай сәулетті ғимарат салынған емес. «Бұл Қазақстандағы ең озық архитектуралық жобамен салынған музыкалық-драмалық театр. Қызылжарлықтар үшін бұл дүбірлі де күмбірлі оқиға. Бұл өңір руханиятының жедел дамуына әсер етері сөзсіз», деді жерлесіміз, белгілі композитор Жоламан Тұрсынбаев.
Театрдың ашылу салтанаты Сәбит Мұқановтың «Аққан жұлдыз» романының желісімен жазылған «Шоқан» спектаклімен жалғасты.
