Достастық мәселелері талқыланды

Кеше Премьер-Министрдің бірінші орынбасары Бақытжан Сағынтаев бастаған қазақстандық делегация Минск қаласында өткен ТМД Үкімет басшылары кеңесінің отырысына қатысты. Осы басқосудың алдында ғана ТМД елдерінің делегация басшылары Беларусь Республикасының Президенті Александр Лукашенкомен кездесіп, отырыстың күн тәртібін талқылап, Достастық аясындағы ынтымақтастықты тереңдету және халықаралық  тақырыптағы өзекті мәселелер бойынша пікірлер алмасқан болатын, деп хабарлады ҚР Премьер-Министрінің баспасөз қызметі. Отырыстың күн тәртібінде достастық елдерінің өзара әрекеттестігін тереңдетуге бағытталған 20-ға жуық экономикалық, гуманитарлық және ұйымдық мәселелер қаралды. Атап айтқанда, ТМД елдерінің 2020 жылға дейінгі инновациялық ынтымақтастығы жөніндегі мемле­кетаралық бағдарламаның 2013 жылғы орындалу барысына талдау жасалынды. Отырыста Б.Сағынтаевтың өз сөзін­де атап көрсеткеніндей экономика саласында инновациялық ынты­мақтас­тықты нығайту, сондай-ақ, ортақ ауыл шаруашылығы рыногын дамытып, ТМД елдерінің азық-түлік қауіпсіздігін қамтамасыз ету аса маңызды мәселелердің бірі болып табылады. Отырыс барысында, ғылыми-тех­ни­калық ақпараттар мен мемлекетаралық алмасу саласындағы ынтымақтастықты ретке келтіру туралы келісімге қол қойылды. Сондай-ақ, радионавигация мен гид­ро­метрология салаларында өзара әрекет­тестікті дамыту жөнінде шаралар белгіленіп, тауарлардың шығу тегі бой­ынша елдерді анықтау ережесіне өзгерістер енгізілді. Гуманитарлық саладағы ынты­мақ­тастық мәселелері талқыланып, ТМД-дағ­ы ұлттық спорт түрлерін дамыту, мал­дардың аусыл ауруының таралу қаупі­мен күрес мәселелері жөнінде шаралар әзір­ленді. Отырыста, басқа да бірқатар мәсе­лелер қаралды. Келесі басқосу 21 қара­ша­да Ашғабад қаласында өтеді деп белгіленді. Сұңғат ӘЛІПБАЙ, «Егемен Қазақстан».