«Павлодарэнерго» АҚ хабарлағандай, төтенше жағдай 27 қараша күні, түнгі сағат 01:20 шамасында орын алған. Әуелі судың өте көп мөлшерде ысырап болуынан №11 қазандық агрегаты істен шығады, ал арада 10 минут өткенде №13, 14, 15 қазандықтары тоқтайды. Сәйкесінше шаһардағы орталықтандырылған жылуға қосылған барлық нысан, соның ішінде тұрғын үйлер мен әлеуметтік нысандарда жылу параметрлері түсіп кетті. Ал ыстық су мүлде тоқтатылды.
Көмірлі шаһарда 150 мыңдай халық тұрады. Апаттың адам айтқысыз екенін ескерген Павлодар облысының әкімі Әбілқайыр Сқақов жексенбі күні таңертеңгілік Екібастұзға жедел жетіп, жағдайды көзімен көрді. Әкім әлеуметтік желідегі парақшасында жағдайды баяндап, қала тұрғындарын сабырлы болуға шақырды.
– Жылу-электр орталығында қазір апат бойынша штаб құрылып, өзімнің бірінші орынбасарым Олег Крук, Екібастұз қаласының әкімі Аян Бейсекин, «Павлодарэнерго» АҚ және Екібастұз ЖЭО басшылары жағдайды бақылауда ұстауда. Сағат 11:00-дегі жағдай бойынша стансада су тұтыну үш есеге өскен. Судың ағып кетуіне тест жүргізілді. Стансада су азайып жатқан жоқ. Бұл жылу желілерінде апат орын алғанын айғақтап отыр. Бірнеше дронды ұшырып, жылу тораптарындағы он зақымдану орнын анықтадық. Жылу желілерінің бір тұсында үлкен апат орын алған болуы керек. Қала тұрғындарынан шыдамдылық танытуды сұраймыз, – деді Ә.Сқақов.
Бұған қоса әкім жөндеу бригадалары ақау шыққан жерлерді жойып жатқанын жеткізді. Алайда жылу құбырларында түнде жоғалып кеткен 1 200 тонна ыстық судың қай тұстан тесіп шыққаны әлі нақтыланбаған. Сағат күндізгі 16:00 шамасында қосымша су жоғалту көлемі 700 тоннаны құрады деп хабарланды.
Облыс әкімінің бірінші орынбасары Олег Крук көпқабатты 130 тұрғын үй бойынша жылу құбырларындағы салқындап кеткен су кезегімен ағызылып жатқанын айтты. Осы арқылы жылыту жүйесінің жүктемесін азайтып, нақты ақау шыққан жерлерді табу оңай болады.
– Жылу-энерго орталығында 3 энергетикалық қазандық, 1 су жылытатын қазандық жұмыс істеп тұр. Стансадағы температуралық параметрлер 52-53 градусты көрсетіп тұр. Оны 60 градусқа дейін жеткізу көзделіп отыр. 15 жөндеу бригадасы құрылып, жылу құбырларында орын алған апаттарды жоюмен шұғылдануда. Тағы 4 бригада өзге жерлердегі ықтимал зақымдануларды іздеп жатыр, – деп хабарлады Екібастұз қаласының әкімі Аян Бейсекин.
Қалалық білім беру бөлімі бүгін шаһардың барлық мектептері оқушыларды қашықтан оқытатынын хабарлады. Кеше кешкісін өмірлік қиын жағдайға тап болған балаларды қолдау орталығының 36 тәрбиеленушісі және «Жас өркен» жасөспірімдер үйінің 11 оқушысы Павлодар қаласына жеткізіліп, №7 мектеп-интернатына орналастырылды. Тағы 29 бала «Білім-инновация» лицейіне ауыстырылды. Қалада жалпы саны 25 мектеп, 21 341 оқушы бар. Шаһар ауруханаларында жатқан 300 адамды қажет болса Павлодар мен Ақсу қалаларындағы емдеу мекемелеріне жеткізу жоспарланып отыр.
Жылумен қамту мекемесі жер үйлердің тұрғындары жүйені қатырып алмауы үшін өз беттерімен жылу батареяларынан ауық-ауық су ағызуды сұрап отыр.
Павлодар облысы,
Екібастұз қаласы
