Кукушкин күні кеше Италиядағы Андрия турнирінің финалында күш сынасу мүмкіндігіне ие болды. Дүниежүзілік рейтингте 223-орында тұрған жерлесіміз жартылай финалда әлемнің 98-ші, осы жарыстың 1-ракеткасы мажарстандық Мартон Фучовичпен шеберлік байқасты. Екі сетке жалғасқан матчта М.Кукушкин қарсыласын 6:4, 6:4 есебімен тізе бүктірді.
Небәрі бір сағат 18 минутта мәресіне жеткен матчта Кукушкин эйс жасамағанымен, 11 брейк-пойнттың төртеуін пайдаланды. М.Фучович 2 эйс, 2 брейкпен көзге түсті. Кукушкин финалда әлемнің 197-ракеткасы швейцариялық Леонардо Рейдимен бас жүлдені сарапқа салады. Қазақстандық теннисші жекелей сында 14 рет челленджер жарысының жеңімпазы атанған. Соңғы рет Михаил 2018 жылы Ирвингтегі (АҚШ) додада үздік шыққан болатын.
