Қоғам • 28 Қараша, 2022

Астанада митинг ұйымдастырған адам 15 тәулікке қамалды

Елордада заңсыз митинг ұйымдастырған адам 15 тәулікке қамалды. Бұл туралы Астана қаласының әкімшілік құқық бұзушылық жөніндегі мамандандырылған ауданаралық соты хабарлады, деп жазады Egemen.kz.

Ботакөз БАҚБЕРГЕН

27 қарашада Астананың әкімшілік құқық бұзушылық жөніндегі мамандандырылған ауданаралық соты Марат Әбиевке қатысты екі істі қарады.

Оған қатысты әкімшілік құқық бұзушылық туралы екі хаттама жасалды:

Бейбіт жиналыстарды ұйымдастыру және өткізу тәртібі туралы заңнамада белгіленген тәртіпті бұза отырып, рұқсат етілмеген митингті ұйымдастырғаны және өткізгені үшін (ӘҚБтК-нің 488-бабының 7-бөлігі);
Полиция қызметкерлерінің қызметтік міндеттерін атқаруына байланысты олардың заңды талаптарына бағынбағаны үшін (ӘҚБтК 667-бабының 1-бөлігі).

Іс материалдарына қарағанда, 26 қарашада Әбиев жергілікті атқарушы органның рұқсатын алмай, Қорғалжын тас жолы бойынша митинг ұйымдастырып, полиция қызметкерлерінің заңды талаптарына бағынбаған.

Сотта Әбиев ел басшылығының назарын ауыл шаруашылығын дамыту жөніндегі жобаға аудару мақсатында бейбіт митинг ұйымдастыруға шешім қабылдағанын түсіндірді.

Сот хабарламасында атап өтілгендей, прокурор соттан Әбиевті кінәлі деп танып, оны 15 тәулікке қамауға алуды сұрады.

«ӘҚБтК-нің 488-бабы 7-бөлігінің санкциясымен 15 АЕК мөлшерінде айыппұл немесе 15 тәулікке дейінгі мерзімге әкімшілік қамаққа алу түріндегі жауапкершілік көзделген. ӘҚБтК-нің 667-бабы 1-бөлігінің санкциясымен 30 АЕК немесе 15 тәулікке дейінгі мерзімге айыппұл салынады», деп атап өтті елордалық соттың баспасөз қызметі.

Нәтижесінде сот Әбиевті жоғарыда аталған құқық бұзушылықтарды жасағаны үшін кінәлі деп танып, екі құқық бұзушылық бойынша 15 тәулікке әкімшілік қамаққа алу түріндегі жазаны қолданды.

Қаулылар заңды күшіне енген жоқ.