Бизнес • 01 Желтоқсан, 2022

Шағын бизнестің шарапаты

Мемлекет басшысы Қасым-Жомарт Тоқаев ұлықтау рәсімінде қазір той тойлайтын уақыт емес, бірден іске көшу керек екенін айтты. Бірқатар бастаманы да жұрт назарына ұсынды.

Egemen Qazaqstan

Коллажды жасаған Зәуреш Смағұл, «ЕQ»

Жалпы, сайлаудан кейін осы уақытқа дейін айтылған реформалар да іс жүзінде жүзеге асатынына сенім мол. Бізге экономиканы дифференциялау өте маңызды. Соның ішінде экономиканың үлкен үлесін құрайтын мұнай, тау-кен металлургиясы салаларына ерекше мән берілуі керек. Энергетика, жол-көлік және ауыл шаруашылығы салалары да өте маңызды. Дәл қазір аталған салаларды дамыту, арнайы жобаларды іске асыру үшін көптеген мүмкіндік бар. Ал шағын және орта бизнеске көңіл бөліну керегі айтпаса да түсінікті. Сол арқылы жұмыс орындары ашылып, еңбекпен қамту мәселелері оңтайланады. Шағын және орта бизнеске жағдай жасалуы үшін салық кодексі мен жергілікті басқару органдарының жүйелі жұмыс істеуі маңызды.

Осыған дейінгі тәжірибемізден жергілікті басқару органдарымен бірлесіп жұмыс істеу шағын және орта бизнес үшін өте тиімді екенін көріп отырмыз. Әр өңірдегі бизнес салалары бойынша мәселелер ашық айтылуы керек. Шағын және орта бизнестің алға жылжуы үшін кедергі туғызатын мәселелер жеңілдетілсе, біршама даму болатыны сөзсіз. Мәселен, субсидия көбіне ірі шаруашылықтарға беріледі. Бұл мәселені шешу үшін жұмыс істеу жүйесі ғана емес, әрбір аудандардағы жергілікті шаруашылықты дамыту бағдарламасы дұрыс жүзеге асуы керек. Президент те өз сөзінде осыған баса мән беріп отыр. Ендігі өзгерістер мен берілген тапсырмалар іс жүзінде орындалады деп сенеміз.

Бизнес жобаларды іске асыру үшін кәсіпкерлердің ынтасы мен белсенділігі ерекше. Біз нақты нәтижеге қол жеткізу үшін бизнес жобаларды іске асыруға дайынбыз.

Райымбек БАТАЛОВ,

«Атамекен» ұлттық кәсіпкерлер палатасының президиум төрағасы